भारतात ज्येष्ठ नागरिक असणे गुन्हा आहे का?” —जया बच्चन

ज्येष्ठ नागरिकांच्या प्रश्नांकडे सरकारचे होत असलेले दुर्लक्ष संसदेत ठळकपणे मांडत माननीय खासदार श्रीमती जया बच्चन यांनी अत्यंत तीव्र आणि भावनिक भाषण केले. त्यांच्या या भाषणामुळे देशभरात ज्येष्ठ नागरिकांच्या समस्या, हक्क आणि सरकारी धोरणांवर नव्याने चर्चा सुरू झाली आहे.

“सरकार जर ज्येष्ठ नागरिकांकडे लक्ष देणार नसेल, तर ६५ वर्षांनंतर सर्व ज्येष्ठ नागरिकांना मारून टाका,” असे कठोर शब्द वापरत त्यांनी सरकारच्या संवेदनशून्यतेवर प्रहार केला. हा उल्लेख प्रत्यक्ष अर्थाने नसून सरकारच्या धोरणांविरोधातील तीव्र संताप व्यक्त करणारा असल्याचे त्यांनी स्पष्ट केले.

जया बच्चन म्हणाल्या, “भारतात ज्येष्ठ नागरिक असणे हा गुन्हा आहे का?” ७० वर्षांनंतर ज्येष्ठ नागरिकांना वैद्यकीय विमा मिळत नाही, ईएमआयवर कर्ज दिले जात नाही, ड्रायव्हिंग लायसन्स नाकारले जाते आणि रोजगाराच्या संधी पूर्णतः बंद होतात. परिणामी, आयुष्यभर देशासाठी काम केलेले नागरिक इतरांवर अवलंबून राहण्यास भाग पडतात.

निवृत्तीपर्यंत सर्व कर, विमा प्रीमियम प्रामाणिकपणे भरलेले ज्येष्ठ नागरिक निवृत्तीनंतरही विविध करांच्या ओझ्याखाली दबले जातात. दुसरीकडे, राजकारणातील ज्येष्ठ नागरिक — आमदार, खासदार, मंत्री — यांना सर्व सुविधा, भत्ते व पेन्शन दिली जाते; मग सामान्य ज्येष्ठ नागरिकांवर अन्याय का, असा थेट सवाल त्यांनी उपस्थित केला.

रेल्वे व विमान प्रवासावरील सवलती बंद करण्यात आल्याने ज्येष्ठ नागरिकांच्या अडचणी वाढल्या असून बँकांच्या व्याजदरात कपात झाल्यामुळे त्यांच्या उत्पन्नातही घट झाली आहे. अत्यल्प पेन्शन मिळणाऱ्यांवरही आयकर लादला जातो, हे अन्यायकारक असल्याचे त्यांनी नमूद केले.

यावेळी त्यांनी सरकारसमोर ज्येष्ठ नागरिकांच्या हितासाठी ठोस मागण्या मांडल्या —

६० वर्षांवरील सर्व नागरिकांना पेन्शन देण्यात यावी.

आर्थिक परिस्थितीनुसार पेन्शनची रक्कम ठरवावी.

रेल्वे, बस व विमान प्रवासात सवलत द्यावी.

शेवटच्या श्वासापर्यंत सर्वांसाठी वैद्यकीय विमा अनिवार्य करून त्याचा प्रीमियम सरकारने भरावा.

ज्येष्ठ नागरिकांच्या न्यायालयीन प्रकरणांना प्राधान्याने निकाल द्यावा.

प्रत्येक शहरात सर्व सुविधांसह ज्येष्ठ नागरिकांसाठी घरे उपलब्ध करून द्यावीत.

जुन्या वाहनांच्या स्क्रॅप धोरणात बदल करून ते फक्त व्यावसायिक वाहनांपुरते मर्यादित ठेवावे; अन्यथा स्क्रॅप झालेल्या वाहनांऐवजी नवीन वाहने द्यावीत.

शेवटी त्यांनी ज्येष्ठ नागरिक आणि तरुणांना आवाहन केले की हा मुद्दा सोशल मीडियावर मोठ्या प्रमाणावर मांडावा. “ज्येष्ठांकडे सरकार बदलण्याचा आयुष्यभराचा अनुभव आहे. त्यांना कमकुवत समजू नका,” असा इशारा देत त्यांनी सरकारला थेट संदेश दिला.

“सब का साथ, सब का विकास”ची घोषणा करणाऱ्या सरकारने राष्ट्रनिर्मितीत योगदान दिलेल्या ज्येष्ठ नागरिकांच्या कल्याणासाठी ठोस पावले उचलावीत, अशी अपेक्षा व्यक्त करत त्यांनी आपले भाषण संपवले.