पुणे, दि. २४ जुलै : दिल्लीतील जंतर-मंतर येथे नीट-यूजी पेपरफुटी आणि विद्यार्थ्यांच्या विविध शैक्षणिक प्रश्नांवर आंदोलन करणाऱ्या विद्यार्थ्यांवर झालेल्या कथित पोलिस कारवाईच्या निषेधार्थ आज (२४ जुलै) पुण्यात ‘कॉक्रोच जनता पार्टी’ (CJP) तर्फे निषेध मोर्चाचे आयोजन करण्यात आले आहे. विद्यार्थ्यांच्या प्रश्नांवर केंद्र सरकारने जबाबदारी स्वीकारावी, तसेच केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून राजीनामा द्यावा, या प्रमुख मागण्यांसाठी हा मोर्चा काढण्यात येत असल्याची माहिती आयोजकांनी दिली आहे. मोर्चा आज दुपारी ३ वाजता शनिवारवाडा (लाल महाल परिसर) येथून सुरू होणार असून फडके हौद, दारूवाला पूल, नरपतगिरी चौक, बोलाई माता मंदिर चौक मार्गे जिल्हाधिकारी कार्यालयापर्यंत जाणार आहे. या पार्श्वभूमीवर पुणे शहर वाहतूक पोलिसांनी मध्यवर्ती भागातील नागरिकांसाठी वाहतुकीसंदर्भात महत्त्वाच्या सूचना जारी केल्या आहेत. मोर्चादरम्यान गणेश रोड, केळकर रोड, शिवाजी रोड आणि नेहरू रोड या प्रमुख मार्गांवर वाहतुकीचा वेग मंदावण्याची तसेच तात्पुरते वाहतूक बदल लागू होण्याची शक्यता व्यक्त करण्यात आली आहे. त्यामुळे या मार्गांवरून प्रवास करणाऱ्या नागरिकांनी शक्यतो पर्यायी मार्गांचा वापर करण्याचे आवाहन करण्यात आले आहे. वाहतूक कोंडी टाळण्यासाठी लक्ष्मी रोड, सूर्य हॉस्पिटल–२५ ऑगस्ट चौक मार्ग, एबीसी–फुटका बुरूज मार्ग, जंगली महाराज रोड–नदीपात्र रोड–टिळक रोड तसेच बॅनर्जी चौक–नेहरू मेमोरियल मार्ग या पर्यायी मार्गांचा वापर करण्याचा सल्ला वाहतूक पोलिसांनी दिला आहे. पोलिसांच्या सूचनेनुसार, परिस्थितीनुसार वाहतुकीत तात्पुरते बदल करण्यात येऊ शकतात. त्यामुळे नागरिकांनी वाहतूक पोलिसांच्या सूचनांचे पालन करावे, प्रभावित मार्ग टाळावेत आणि प्रवासासाठी अतिरिक्त वेळ राखून ठेवावा. विशेषतः दुपारी ३ नंतर मध्य पुण्यात कामानिमित्त ये-जा करणाऱ्या नागरिकांनी पर्यायी मार्गांचा वापर केल्यास वाहतूक कोंडी टाळण्यास मदत होईल, असे पोलिसांनी स्पष्ट केले आहे. दरम्यान, दिल्लीतील विद्यार्थ्यांवरील कथित पोलिस कारवाईचा निषेध आणि शिक्षण व्यवस्थेतील प्रश्नांवर केंद्र सरकारने ठोस भूमिका घ्यावी, या मागण्यांमुळे या मोर्चाकडे विद्यार्थी, सामाजिक संघटना आणि नागरिकांचे लक्ष लागले आहे. कायदा व सुव्यवस्था अबाधित राखण्यासाठी पोलिसांकडून आवश्यक बंदोबस्तही तैनात करण्यात आला आहे.
अवघ्या १५ लाखांत हक्काचे घर! म्हाडाकडून ३५४ कुटुंबांचे गृहस्वप्न साकार; सांगली-मिरजमध्ये परवडणाऱ्या घरांची सुवर्णसंधी सांगली, दि. २४ जुलै : सर्वसामान्य नागरिकांना परवडणाऱ्या दरात हक्काचे घर उपलब्ध करून देण्याच्या उद्देशाने महाराष्ट्र गृहनिर्माण व क्षेत्र विकास प्राधिकरण (म्हाडा) पुणे मंडळाने सांगली आणि परिसरातील नागरिकांसाठी मोठा दिलासा दिला आहे. ‘प्रथम येईल त्यास प्राधान्य’ या तत्त्वावर सुरू असलेल्या योजनेतून सांगली, मिरज आणि पलूस परिसरातील एकूण ३५४ सदनिकांचे वाटप करण्यात आले असून अनेक कुटुंबांचे स्वतःच्या घराचे स्वप्न साकार झाले आहे. म्हाडाच्या गृहनिर्माण योजनांसह पंतप्रधान आवास योजना (PMAY) अंतर्गत आर्थिकदृष्ट्या दुर्बल, अल्प उत्पन्न आणि मध्यम उत्पन्न गटातील नागरिकांना परवडणाऱ्या किमतीत घरे उपलब्ध करून दिली जात आहेत. सांगलीतील चिंतामणीनगर, अभयनगर, कर्नाळ रोड आणि पारिजात कॉलनी येथील प्रकल्पांमध्ये सध्या ३५४ कुटुंबे वास्तव्यास आहेत. दरम्यान, मिरज येथील भारतनगर परिसरातील नव्याने पूर्ण झालेल्या प्रकल्पातील ३४ सदनिका अद्याप उपलब्ध असून वीज आणि पाणीपुरवठ्याची सुविधा पूर्ण झाल्यानंतर इच्छुक लाभार्थ्यांना त्यांचा ताबा दिला जाणार आहे. म्हाडाने यंदा पुणे विभागासाठी घरांची लॉटरी खुली केली असून अवघ्या १५ लाख रुपयांपासून घरे उपलब्ध असल्याने सर्वसामान्य नागरिकांना मोठा दिलासा मिळाला आहे. दिव्यांग, खेळाडू, केंद्र व राज्य सरकारी कर्मचारी तसेच इतर मागास प्रवर्गासाठी १३ टक्के घरे आरक्षित ठेवण्यात आली आहेत. मुख्य अधिकारी राहुल साकोरे यांनी नागरिकांना विहित मुदतीत ऑनलाईन अर्ज व रकमेचा भरणा करण्याचे आवाहन केले आहे. आवश्यक कागदपत्रांची ऑनलाईन पडताळणी पूर्ण झाल्यानंतर लाभार्थ्यांना देकारपत्रे वितरित करण्यात येणार असल्याचे त्यांनी सांगितले. पात्रता अर्जदाराचे वय किमान १८ वर्षे असावे. किमान १५ वर्षे महाराष्ट्राचा रहिवासी असावा. अधिवास प्रमाणपत्र आवश्यक. अर्जदार किंवा त्याच्या पती/पत्नीच्या नावावर घर नसावे. उत्पन्न गट आर्थिकदृष्ट्या दुर्बल : वार्षिक उत्पन्न ३ लाखांपर्यंत अल्प उत्पन्न गट : ३ ते ६ लाख मध्यम उत्पन्न गट : ६ ते १२ लाख उच्च उत्पन्न गट : १२ लाखांपेक्षा जास्त म्हाडाच्या या योजनेमुळे सर्वसामान्य नागरिकांना कमी किमतीत दर्जेदार घर मिळण्याचा मार्ग मोकळा झाला असून, आगामी काळात आणखी गृहप्रकल्प राबविण्याची तयारीही सुरू आहे.
Post Views: 17
