पोलिसांकडून मिळालेल्या माहितीनुसार, मगरपट्टा येथील सिझन्स मॉलसमोरील ‘द कॉस्मो पॉलिस’ इमारतीमध्ये ‘द फॉरेव्हर’ नावाचे स्पा सेंटर सुरू होते. या ठिकाणी मसाज व स्पा सेवेच्या नावाखाली तरुणींना पैशांचे आमिष दाखवून त्यांच्याकडून देहविक्रीचा व्यवसाय करून घेतला जात असल्याची गुप्त माहिती हडपसर पोलीस ठाण्याचे वरिष्ठ पोलीस निरीक्षक हेमंत पाटील यांना मिळाली होती.
या माहितीची खातरजमा करण्यासाठी पोलिसांनी प्रथम बनावट ग्राहक (बोगस पंटर) पाठवून परिस्थितीची पडताळणी केली. संशयाची खात्री झाल्यानंतर पोलिसांच्या पथकाने स्पा सेंटरवर अचानक छापा टाकला. कारवाईदरम्यान तेथे अनैतिक प्रकार सुरू असल्याचे स्पष्ट झाले. पोलिसांनी तात्काळ तीन पीडित तरुणींना सुरक्षित ताब्यात घेऊन त्यांची सुटका केली.
या प्रकरणात स्पा सेंटरची मालकीण अश्विनी मुरडे (रा. कल्याणीनगर) आणि व्यवस्थापक रकबुल अबुल हुसेन यांच्याविरुद्ध अनैतिक मानवी वाहतूक (प्रतिबंधक) कायद्यानुसार गुन्हा दाखल करण्यात आला आहे. या प्रकरणी पोलीस हवालदार बाबू लोणकर यांनी फिर्याद दिली असून पुढील तपास हडपसर पोलीस करत आहेत.
प्राथमिक तपासात आरोपी तरुणींना आर्थिक प्रलोभन देऊन देहविक्रीच्या व्यवसायात ढकलत असल्याचे समोर आले आहे. तसेच या व्यवसायातून मिळणाऱ्या पैशांवर आरोपी स्वतःची उपजीविका करत असल्याची माहितीही तपासात पुढे आली आहे. सुटका करण्यात आलेल्या पीडित तरुणींना आवश्यक कायदेशीर आणि सामाजिक मदत उपलब्ध करून देण्याची प्रक्रिया सुरू करण्यात आली आहे.
हडपसर पोलिसांच्या या कारवाईमुळे मगरपट्टा व परिसरातील बेकायदेशीररीत्या चालणाऱ्या स्पा सेंटर चालकांमध्ये खळबळ उडाली असून अशा प्रकारच्या अवैध व्यवसायांवर पुढील काळातही कठोर कारवाई सुरू राहणार असल्याचे पोलिसांकडून सांगण्यात आले आहे. या प्रकरणाचा अधिक तपास सुरू असून या रॅकेटशी संबंधित इतर व्यक्तींचा सहभाग आहे का, याचाही शोध पोलीस घेत आहेत.
