आंतरराष्ट्रीय दर्जाच्या पुणे ग्रँड टूर सायकल स्पर्धेच्या अंतिम दिवशी एक अनोखा आणि संस्मरणीय क्षण अनुभवायला मिळाला. स्पर्धेच्या समारोपप्रसंगी मराठी संगीताच्या तालावर विदेशी सायकलपटू थिरकताना दिसले आणि खेळ व संस्कृती यांचा दुर्मिळ संगम पुणेकरांनी प्रत्यक्ष पाहिला.
समारोपाच्या कार्यक्रमात नटी ने मारली मिठी या मराठी गाण्यांवर विदेशी सायकलपटू फिरकले तसेच मराठी लोकगीतं, ढोल-ताशांचा निनाद आणि जल्लोषपूर्ण वातावरण निर्माण झाले होते. यावेळी युरोप, आशिया व आफ्रिकेतील विविध देशांतील सायकलपटूंनी मराठी गाण्यांच्या तालावर उत्स्फूर्तपणे नृत्य करत उपस्थितांची मने जिंकली. खेळाडूंचा हा आनंदोत्सव पाहून प्रेक्षकांनी टाळ्यांच्या गजरात प्रतिसाद दिला.
या स्पर्धेत सहभागी झालेल्या विदेशी खेळाडूंनी मराठी संस्कृतीबद्दल कुतूहल आणि आपुलकी व्यक्त केली. “भारतीय, विशेषतः मराठी संस्कृतीचा हा अनुभव आमच्यासाठी अविस्मरणीय आहे. स्पर्धेसोबत मिळालेला हा सांस्कृतिक आनंद आयुष्यभर लक्षात राहील,” अशी प्रतिक्रिया काही खेळाडूंनी दिली.
पुणे ग्रँड टूर ही केवळ क्रीडा स्पर्धा न राहता, स्थानिक संस्कृतीला जागतिक व्यासपीठ मिळवून देणारा उत्सव ठरत असल्याचे यानिमित्ताने अधोरेखित झाले. आयोजकांनी देखील स्पर्धेच्या प्रत्येक टप्प्यावर महाराष्ट्राची सांस्कृतिक ओळख जपण्याचा प्रयत्न केल्याचे सांगितले.
हजारो नागरिक, क्रीडाप्रेमी आणि पर्यटकांच्या उपस्थितीत पार पडलेल्या या समारोप सोहळ्याने पुणे शहराची क्रीडा व सांस्कृतिक राजधानी म्हणून ओळख अधिक दृढ केली. खेळाच्या माध्यमातून विविध देशांना जोडणारा हा क्षण पुणे ग्रँड टूरच्या इतिहासात कायमचा कोरला गेला.
