बॉलीवूड अभिनेत्री आणि खासदार कंगना रणौत यांनी महाराष्ट्राचे उपमुख्यमंत्री अजित पवार यांच्या आकस्मिक निधनाबद्दल शोक व्यक्त केला आणि ही बातमी “भयानक” आणि पचवण्यास कठीण असल्याचे त्यांनी एका मुलाखतीत म्हटले. उपमुख्यमंत्र्यांच्या निधनाची बातमी व्हायरल होत असताना कंगना राणौत संसदेत जात होती. ही बातमी ऐकून त्यांना धक्का बसला.
सोशल मीडियावर फिरणाऱ्या एका व्हिडिओमध्ये कंगना रणौतला अजित पवारांच्या निधनाची बातमी मीडियाने कळवली. यावर प्रतिक्रिया देताना त्या म्हणाल्या की, अरे देवा ही खूपच भयानक आहे. सॉरी, मी आता घाईघाईत आले आहे… मी माझ्या भावना एकवठून मगच माझे स्टेटमेंट देईन.
कंगनाचा हा व्हिडिओ व्हायरल होत असून लोक तिला ट्रोल करु लागले आहेत. शोक व्यक्त करायला पण हिला स्क्रिप्ट लागते का असे बरेचजण विचारत आहेत. तर एकाने लिहिले की हिला फक्त मोदी आणि योगी कुठे असतात हेच माहिती असतं. तर काही युझर्स अजित पवार यांना श्रद्धांजली वाहत आहेत.
ही बातमी केवळ कंगनासाठीच नाही तर संपूर्ण देशासाठी धक्कादायक आहे. बुधवारी सकाळी बारामती विमानतळाच्या लँडिंग रनवेजवळ चार्टर्ड विमान कोसळल्याने अजित पवार आणि त्यांच्या बरोबर असलेल्या इतर पाचजणांचा मृत्यू झाला. घटनास्थळावरून मिळालेल्या दृश्यांमध्ये विमान आगीत आणि धुराच्या लोटांनी वेढलेले दिसून आले.
अजित दादा गेले ही बातमी अजूनही कोण पचवू शकलेले नाही. जी व्यक्ती आपल्या सभांसाठी म्हणून आपल्या मुळ गावी निघते. तिथे ती पोहचूनही कायमची या जगातून निघून गेल्याची बातमी धडकते हे सर्व पचवणे सर्वांसाठीच कठीण आहे. राष्ट्रवादी काँग्रेसचे नेते अजित पवार हे बारमतीला जिल्हापरिषद निवडणूकांनिमित्त सभा घेण्यासाठी जात होते पण त्यापूर्वीच काळाने घाला घातला.
अजित पवार यांच्या निधनावर इंडस्ट्रीतील अनेक जण शोक व्यक्त करत आहेत. राजकारणतले नसूनही अनेकांना त्यांच्या जाण्याचे दु:ख झाले आहे. अजित दादा हे आपल्या शब्दाचे वेळेचे पक्के होते. त्यांनी दिलेला शब्द आणि वेळ ते कधीच चुकवायचे नाहीत. गोरगरीबांच्या मदतीला ते नेहमीच तत्पर असायचे.
