मुंबई : राज्याचे उपमुख्यमंत्री अजित पवार यांच्या विमानाला अपघात झाल्याची माहिती मिळताच अर्थसंकल्पीय अधिवेशनानिमित्त दिल्लीत असणाऱ्या त्यांच्या पत्नी सुनेत्रा पवार आणि बहीण सुप्रिया सुळे या तातडीने बारामतीच्या दिशेने रवाना झाल्या. मात्र, मुंबईत असलेले अजित पवार यांचे काका आणि राष्ट्रवादी काँग्रेसचे संस्थापक शरद पवार यांना ही बातमी थोडी उशिरानेच कळविण्यात आली.
पवार कुटुंबातील सदस्यांना ही माहिती बातम्यांच्या माध्यमातून आणि अधिकाऱ्यांच्या माध्यमातून अचानक कळली. मात्र शरद पवार यांना याबाबत सुरुवातीला कोणत्याही प्रकारची माहिती देण्यात आलेली नव्हती. ब्रीच कँडी येथे बुधवारी त्यांची नियमित तपासणी झाल्यानंतर डॉक्टरांच्या उपस्थितीत त्यांना या दुर्दैवी घटनेची माहिती देण्यात आल्याचे समजते.
अजित पवार यांच्या निधनाची बातमी समोर आली तेव्हा शरद पवार यांनी घरात टीव्ही किंवा मोबाइल फोन पाहिला नव्हता असे समजते. त्यांना नियमित आरोग्य तपासणीसाठी ब्रीच कँडी रुग्णालयात जायचे असल्याने ते बहुधा त्याच तयारीत होते. याचवेळी पवार यांच्या मुंबईतील निवासस्थानाबाहेर प्रसारमाध्यमांचे प्रतिनिधी मोठ्या संख्येने जमा झाले. प्रसारमाध्यम प्रतिनिधींची वाढती गर्दी पाहून तैनात असलेल्या पोलिसांनी सर्व प्रतिनिधींना ‘थोड्याच वेळात शरद पवार हे रुग्णालयात जाणार असल्याने तुम्ही इथे थांबू नका, लांब उभे रहा, जेणेकरून त्यांना कोणताच प्रश्न पडू नये’, अशी विनंती केली. मात्र तरीही काही प्रतिनिधी तिथेच उभे राहिले.
त्यानंतर रुग्णालयात जात असताना शरद पवार यांनी प्रसारमाध्यमाच्या प्रतिनिधींना पाहिले आणि त्यांना इशारा करून, ‘तुम्ही का उभे आहात’, असे विचारले. मात्र या प्रश्नाला माध्यमांनी वा त्यांच्यासोबत असलेल्या कोणीच काहीच उत्तर दिले नाही. ब्रीच कँडी रुग्णालयात शरद पवार यांची तपासणी झाली. त्यानंतर डॉक्टरांच्या उपस्थितीत अजित पवार यांच्या निधनाची माहिती एका अधिकाऱ्याच्या माध्यातून शरद पवार यांना देण्यात आली. या बाबतची माहिती मिळताच शरद पवार हे तडक बारामतीसाठी मुंबईहून रवाना झाले.
