पुणे महानगरपालिकेमध्ये भारतीय जनता पक्षाने निर्विवाद वर्चस्व मिळवलं आहे. पुण्यामध्ये खरी लढाई ही भाजप आणि राष्ट्रवादीमध्ये होती. यामध्ये भाजपने 119 जागांवर विजय मिळवत महापालिकेवर एक हाती झेंडा फडकवला आहे. या लढाईमध्ये अजित पवारांच्या राष्ट्रवादीतील अनेक नेत्यांना पराभवाचं तोंड पाहावं लागलं आहे. यामध्ये माजी महापौर दत्तात्रय धनकवडे यांच्यासह राष्ट्रवादीच्या माजी प्रवक्त्या रूपाली पाटील ठोंबरे यांचा सुद्धा समावेश आहे. रूपाली पाटील ठोंबरे यांचा पराभव झाल्यानंतर त्यांच्यावर समाज माध्यमातून टीकेची झोड उठत आहे. याच टीकेविरोधात रूपाली पाटील यांनी थेट कायदेशीर कारवाईचा इशारा दिला आहे.
रुपाली ठोंबरे यांनी म्हटलंय की, “सोशल मीडियावर बंधू, भगिनी, वडील मंडळी, तसंच पोर्टल, न्यूज चॅनेल यांनी माझ्याबाबतीत जाणीवपूर्वक हेतुपुरस्कर फेक नेरेटिव्ह पोस्ट, बदनामीकारक पोस्ट, अश्लील कमेंट कृपया करुच नये. वैचारिक मनभेद असतील, आपण माहिती घेऊन तपासून खात्री करून मगच व्यक्त व्हावे किंवा पोस्ट करावी. आपल्याला संविधानाने मिळालेल्या स्वातंत्र्याचा दुसऱ्यासाठी गैरवापर करून बदनामी, अश्लील कमेंट करू नये. अन्यथा नाहक आपल्यावर कायदेशीर कडक कारवाई करावी लागेल व गुन्हा सुद्धा दाखल करावा लागेल. त्यामुळे माझी विनंती आहे फेक नेरेटिव्ह पसरवणाऱ्या ट्रोलर्सनी माझ्या बाबतीत कोणतीच चुकीच्या बदनामीच्या पोस्ट करू नये. जाणीवपूर्वक गैरसमज करणाऱ्या पोस्ट करू नये,” असा इशारा रुपाली पाटील ठोंबरे यांनी दिला आहे.
“मी व माझी सोशल टीम ट्रोलर्सना जशास तसे उतर देण्यास समर्थ आहोतच, पण त्यासोबत कडक कायदेशीर कारवाई सुद्धा करण्यास तत्पर आहे. त्यामुळे ट्रोलर्स तो कोणत्याही पक्षाचा, जातीचा, धर्माचा असो संविधानाने, कायद्याने, घटनेने कायदेशीर कारवाईस पात्र राहील. नो फेक नेरेटिव्ह, नो बदनामी पोस्ट, नो अश्लील कमेंट्स, नो अब्रुनुकसान नो समाज भावना दुखावणे. हीच जाहीर नोटीस समजावी,” असं देखील रुपाली पाटील यांनी म्हटलं आहे.
दरम्यान, रुपाली पाटील यांनी पुण्यातील प्रभाग क्रमांक 25 आणि 26 या दोन प्रभागामधून निवडणूक लढवली होती. या दोनही प्रभागातून रुपाली पाटलांना पराभव स्वीकारावा लागला होता. मतमोजणी दरम्यान त्यांनी निवडणूक प्रक्रियेवर आक्षेप घेत मोठा गोंधळ देखील घातला होता. यावरूनच रुपाली पाटील यांच्यावर टीका होत आहे. अशातच आता रुपाली पाटलांनी ट्रोलर्सना थेट कायदेशीर कारवाईचा इशारा दिला आहे.
