इंदिरानगर बोगद्याच्या रुंदीकरणाचे काम पूर्णत्वास आल्याने या महिनाअखेरपर्यंत तेथील वाहतूक कोंडी टळण्याची शक्यता असताना, आता द्वारकाजवळील ‘ग्रेड-सेपरेटर’च्या कामाला सुरुवात होणार आहे. त्यामुळे वाहतूक कोंडी मुंबई-आग्रा महामार्गावरील पुढील टप्प्यात उद्भवण्याची शक्यता आहे. पोलिसांनी मोठ्या प्रमाणात वाहतूक मार्गात बदल करण्याचा निर्णय घेतला आहे. त्यासंदर्भातील अधिसूचना लवकरच जारी होणार असून, नागरिकांना आणखी काही महिने अडचणींचा सामना करावा लागेल.
सारडा सर्कल ते द्वारका या रस्त्यावर जानेवारी अखेरीस ‘ग्रेड सेप्रेटर’च्या निर्मितीला सुरुवात होत असल्याने वाहतूक कोंडीत आणखी भर पडण्याची चिन्हे असल्याने राष्ट्रीय महामार्ग प्राधिकरणाने (न्हाई) इंदिरानगर बोगद्यासह राणेनगर येथील ‘रॅम्प’ उभारणीला वेग दिला आहे. राणेनगर येथील ‘रॅम्प’साठीची भिंत उभी राहत असून, इंदिरानगर येथील बोगद्याचे काम अंतिम टप्प्यात आहे. फेब्रुवारी अखेरपर्यंत दोन्ही ठिकाणचे ‘रॅम्प’ उभारणी पूर्ण करण्यासाठी संबंधित यंत्रणांनी हालचाली सुरू केल्या आहेत.
दरम्यान, इंदिरानगर येथेही बोगदा काहीसा रुंद झाल्यावर सर्व्हिसरोडपर्यंत येईल. त्यावर पूल उभारला जाईल. त्यामुळे ज्यांना थेट मुंबई नाका व पाथर्डी फाट्याच्या दिशेने जायचे आहे, ते पूलावरून जातील, असे ‘न्हाई’च्या वरिष्ठ अधिकाऱ्यांनी सांगितले. या निर्णयामुळे कोंडी फुटण्याची शक्यता असून, आता द्वारकाजवळील ‘ग्रेड-सेपरेटर’ची उभारणी सुरू होणार आहे. त्यासंदर्भात सन २०२५ मध्येच घोषणा करण्यात आली होती.
तर मंत्रालयामार्फत २१४ कोटी मंजुरीचीही घोषणा झाली असून, जानेवारीच्या अखेरच्या आठवड्यापर्यंत निर्मितीसंदर्भातील अंतिम नियोजन पूर्ण होणार आहे. त्या अनुषंगाने आयुक्तालयात झालेल्या बैठकीत वाहतूक मार्गांत बदल करण्यापूर्वी सर्वेक्षणाचे आदेश पोलिस आयुक्तांनी दिले आहेत. त्यानुसार पथकांनी सर्वेक्षण पूर्ण केले असून, अहवालप्राप्तीनंतर पुढील निर्णय होणार आहे.
नेमकं काय होणार ?
सारडा सर्कल ते काठेगल्ली या रस्त्यावर ८०० मीटर लांबीचे ‘ग्रेड-सेपरेटर’
वडाळा नाका सिग्नलपासून ट्रॅक्टर हाउसकडे ३०० मीटर लांबीचे ‘ग्रेड-सेपरेटर’
सध्या द्वारका परिसरात असलेले भूयारी रस्ते काढण्यात येणार
‘ग्रेड-सेपरेटर’ मधून दुतर्फा वाहतूक होणार
नाशिकरोड, आडगाव, पुणे व धुळेकडे जाणाऱ्या वाहनांना ‘ग्रेड-सेपरेटर’ वापरता येईल
पहिल्या टप्प्यात सारडा सर्कल ते काठेगल्ली ‘ग्रेड-सेपरेटर’ होणार
सिंहस्थापूर्वी एकाच ‘ग्रेड सेपरेटरच’चे काम पूर्ण होणे शक्य
सिंहस्थानंतर दुसऱ्या ‘ग्रेड-सेपरेटर’च्या कामाची शक्यता
