ठाणे: उपमुख्यमंत्री एकनाथ शिंदेंच्या बालेकिल्ल्यात शिवसेनेनं पुन्हा एकदा दाखवली आहे. ठाणे महापालिकेत शिवसेना आणि भाजपची युती झाली. ठाण्यात भाजप स्वबळावर लढण्यास उत्सुक होता. पण वरिष्ठ पातळीवरुन चक्रं फिरली आणि युतीचा आदेश दिला. ठाण्यात युतीच्या राजकारणात शिवसेना मोठा भाऊ राहिली आहे. शिवसेना सर्वाधिक जागा लढत आहे. ठाण्यात एकूण १३१ प्रभाग आहेत. यातील ६२ जागांचं चित्र स्पष्ट झालं आहे. यात शिवसेनेनं आघाडी घेतली आहे.
एकनाथ शिंदे यांनी २०२२ मध्ये शिवसेनेच्या इतिहासातील सर्वात मोठं बंड करत पक्षावरच दावा केला. त्यानंतर झालेल्या लोकसभा, विधानसभा निवडणुकीत शिंदे यांनी त्यांच्या बालेकिल्ल्यात ताकद दाखवून दिली. या दोन्ही निवडणुकांमध्ये ठाकरेंच्या पक्षाला ठाण्यात भोपळाही फोडता आला नाही. पण महापालिकेला ठाकरेंना ठाण्यात खातं उघडलं आहे.
उपमुख्यमंत्री एकनाथ शिंदे यांचं निवासस्थान असलेल्या परिसरातील प्रभागात ठाकरेसेनेच्या उमेदवारानं बाजी मारत आश्चर्यकारक निकालाची नोंद केली आहे. माजी महापौर अशोक वैती यांचा ६६७ मतांनी पराभव करत शिवसेना उबाठाचे शहाजी खुस्पे विजयी झाले आहेत. त्यामुळे शिंदे यांचं निवासस्थान असलेल्या प्रभागाचा नगरसेवक ठाकरेसेनेचा असणार आहे.
शिंदे यांचं निवासस्थान असलेल्या प्रभागात ठाकरेसेनेला यश मिळालं आहे. पण उर्वरित शिंदेंच्या शिवसेनेनं घोडदौड कायम राखली आहे. ठाणे महापालिका निवडणुकीसाठी शिंदेसेना आणि भाजपची युती आहे. आतापर्यंत १३१ पैकी ६२ जागांचे कल हाती आले आहेत. यापैकी २९ जागांवर शिंदेसेनेचे उमेदवार पुढे आहेत. भाजपला १५ जागांवर आघाडी आहे. अजित पवारांची राष्ट्रवादी काँग्रेस ५, तर शरद पवारांची राष्ट्रवादी काँग्रेस ४ जागांवर पुढे आहे. ठाकरेंच्या शिवसेनेला ३ जागांवर आघाडी आहे. तर काँग्रेस आणि मनसेला भोपळा फोडण्यात अपयश येताना दिसत आहे. ६ जागांवर इतर आघाडीवर आहेत.
२०१७ मध्ये ठाणे महापालिकेची अखेरची निवडणूक झाली. या निवडणुकीत शिवसेना विरुद्ध भाजप असा थेट सामना झाला. त्यावेळी शिवसेना एकसंध होती. त्या निवडणुकीत शिंदे यांनीच ठाण्यात सेनेचं नेतृत्त्व केलं. तेव्हा शिवसेनेनं ६७ जागा जिंकत स्पष्ट बहुमत मिळवलं. तर भाजपला २३ जागा मिळाल्या होत्या.
