नागाव (कोल्हापूर) : गुटखा तस्करीच्या संशयित कारने भरधाव वेगात दुचाकीला धडक दिल्याने भादोले येथील वल्लभ संजय माने (वय २५) यांचा मृत्यू झाल्याची धक्कादायक घटना घडली. हा अपघात पुणे-बंगळूर राष्ट्रीय महामार्गावरील शिरोली औद्योगिक वसाहत परिसरात ‘बालभारती’समोर घडला.
अपघातानंतर पोलिसांनी संबंधित कारची तपासणी केली असता त्यामध्ये अडीच लाख रुपयांहून अधिक किमतीचा गुटखा आढळून आला. त्यामुळे हा अपघात केवळ वाहतूक दुर्घटना नसून बेकायदा गुटखा वाहतुकीशी संबंधित असल्याच्या संशयाला बळ मिळाले आहे.
भरधाव कारच्या जोरदार धडकेत दुचाकीस्वार वल्लभ माने गंभीर जखमी झाले. त्यांचा या अपघातात मृत्यू झाला. अपघातानंतर परिसरात खळबळ उडाली असून, बेकायदा गुटखा वाहतूक आणि भरधाव वाहनांमुळे महामार्गावरील सुरक्षिततेचा प्रश्न पुन्हा एकदा ऐरणीवर आला आहे.
पोलिसांनी कारमधील गुटखा जप्त करून पुढील तपास सुरू केला आहे. कारमधील गुटखा नेमका कुठून आणण्यात आला होता, तो कुठे नेला जात होता आणि या तस्करीमागे आणखी कोणाचा सहभाग आहे का, याचाही तपास होण्याची शक्यता आहे.
थोडक्यात :
गुटखा तस्करीच्या संशयित भरधाव कारने दुचाकीला धडक दिल्याने भादोले येथील २५ वर्षीय वल्लभ माने यांचा मृत्यू झाला. अपघातानंतर कारमधून अडीच लाख रुपयांहून अधिक किमतीचा गुटखा जप्त करण्यात आला असून, या प्रकरणाचा पुढील तपास सुरू आहे.
