पुणे : सोशल मीडिया इन्फ्लुएन्सर आणि मोटिवेशनल स्पीकर असल्याचे भासवत एका २३ वर्षीय युवकाने स्वतःला आध्यात्मिक गुरू म्हणून सादर केले आणि एका २२ वर्षीय तरुणीला भीती दाखवून तिच्याकडून अर्धनग्न फोटो मागितल्याचा धक्कादायक प्रकार पुण्यात उघडकीस आला आहे. या प्रकरणी कोंढवा पोलिसांनी आरोपीला अटक केली आहे. आरोपीचे नाव दिव्य जितेंद्र परमार असल्याची माहिती समोर आली आहे.
पीडित तरुणीने कोंढवा पोलिस ठाण्यात तक्रार दिल्यानंतर हा प्रकार उघडकीस आला. आरोपीने तथाकथित आध्यात्मिक मार्गदर्शनाच्या नावाखाली तरुणीशी संपर्क साधून तिच्या आयुष्यातील प्रगती आणि वैयक्तिक प्रश्नांबाबत विश्वास संपादन करण्याचा प्रयत्न केल्याचा आरोप आहे. त्यानंतर कथित भीती निर्माण करून आक्षेपार्ह मागण्या केल्याचे तक्रारीत म्हटले आहे.
पोलिसांनी आरोपीविरुद्ध भारतीय न्याय संहिता (BNS) मधील संबंधित कलमे, महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायदा तसेच माहिती तंत्रज्ञान कायद्यानुसार गुन्हा दाखल केला आहे. आरोपीचा मोबाईल आणि लॅपटॉप जप्त करण्यात आला असून, त्याने इतर महिलांशीही अशाच प्रकारे संपर्क साधला होता का, याचा तपास सुरू आहे.
या घटनेमुळे सोशल मीडियावर स्वतःला आध्यात्मिक गुरू, मोटिवेशनल स्पीकर किंवा इन्फ्लुएन्सर म्हणून सादर करणाऱ्या व्यक्तींबाबत नागरिकांनी सावध राहण्याची गरज पुन्हा अधोरेखित झाली आहे.
थोडक्यात :
तथाकथित आध्यात्मिक मार्गदर्शनाच्या नावाखाली तरुणीकडे आक्षेपार्ह फोटो मागितल्याच्या आरोपावरून पुण्यात एका युवकाला कोंढवा पोलिसांनी अटक केली असून, त्याच्या मोबाईल व लॅपटॉपची तपासणी सुरू आहे.
