ग्रामस्थ व विद्यार्थ्यांना बचाव आणि मदतकार्याचे प्रात्यक्षिकासह मार्गदर्शन
दहिवडी, ता. ११ : नैसर्गिक तसेच मानवनिर्मित आपत्तीच्या काळात घाबरून न जाता परिस्थितीला योग्य पद्धतीने प्रतिसाद कसा द्यावा, याबाबत ५ बटालियन राष्ट्रीय आपत्ती प्रतिसाद दल (NDRF), पुणे यांच्या पथकाने मलवडी (ता. माण) येथे ग्रामस्थ आणि विद्यार्थ्यांना मार्गदर्शन केले.
एनडीआरएफच्या वतीने ‘समुदाय जागृती कार्यक्रम’ आणि ‘शालेय सुरक्षा कार्यक्रम’ आयोजित करण्यात आले. समुदाय जागृती कार्यक्रमांतर्गत ग्रामस्थांना आपत्तीपूर्व तयारी, पूर किंवा अन्य संकटांच्या वेळी घ्यावयाची खबरदारी, सुरक्षित स्थलांतर तसेच आपत्कालीन परिस्थितीत बचाव व मदतकार्य करण्याच्या पद्धतींबाबत माहिती देण्यात आली.
यावेळी त्रिंबकराव काळे विद्यालय आणि श्री शांतिगिरीजी महाराज इंग्लिश मीडियम स्कूल येथे शालेय सुरक्षा कार्यक्रम घेण्यात आला. एनडीआरएफच्या जवानांनी विद्यार्थ्यांना भूकंप, पूर, आग, वीज पडणे यांसारख्या आपत्तींच्या वेळी स्वतःचा तसेच इतरांचा बचाव कसा करावा, याचे प्रत्यक्ष प्रात्यक्षिक करून दाखवले.
आपत्तीच्या प्रसंगी प्राथमिक स्वरूपात कोणती खबरदारी घ्यावी, मदतकार्य कसे सुरू करावे आणि सुरक्षितपणे परिस्थितीतून बाहेर कसे पडावे, याबाबत विद्यार्थ्यांच्या प्रश्नांना जवानांनी उत्तरे देत मार्गदर्शन केले. या उपक्रमामुळे ग्रामस्थ आणि विद्यार्थ्यांमध्ये आपत्ती व्यवस्थापनाबाबत जागरूकता निर्माण होण्यास मदत झाली.
या कार्यक्रमात एनडीआरएफ पथकातील इन्स्पेक्टर अंकितकुमार यादव, हवालदार राहुल जगदाळे, अविनाश बाबर, रेस्क्यूअर गजानन पात्रिकर, खंडू कांबळे आणि टिंकू कुमार यांनी सहभाग घेऊन मार्गदर्शन केले.
मुख्य मुद्दे
- मलवडीत एनडीआरएफचा समुदाय जागृती कार्यक्रम
- ग्रामस्थांना आपत्तीपूर्व तयारीचे मार्गदर्शन
- विद्यार्थ्यांना शालेय सुरक्षा आणि बचावकार्याचे धडे
- भूकंप, पूर, आग आणि वीज पडण्याच्या प्रसंगी बचावाचे प्रात्यक्षिक
- सुरक्षित स्थलांतर व आपत्कालीन मदतकार्याबाबत माहिती
