वाराणसी : सार्वजनिक ठिकाणी महिलांची छेडछाड करणाऱ्या रोडरोमिओंच्या घटना नेहमीच समोर येत असतात. मात्र उत्तर प्रदेशातील वाराणसी येथे याच्या अगदी उलट प्रकार उघडकीस आला आहे. दोन महिलांनी रेल्वे स्थानकाबाहेर येणाऱ्या-जाणाऱ्या पुरुषांना अश्लील हावभाव करून, टोमणे मारून आणि वारंवार त्रास दिल्याचा आरोप असून, अनेक दिवस सुरू असलेल्या या प्रकारामुळे त्रस्त झालेल्या काही पुरुषांनी अखेर पोलिसांकडे धाव घेतली. तक्रारीची दखल घेत पोलिसांनी कारवाई करत दोन्ही महिलांना ताब्यात घेतले आहे.
मिळालेल्या माहितीनुसार, हा प्रकार वाराणसी येथील कॅन्ट रेल्वे स्थानकासमोरील उड्डाणपुलाजवळ घडत होता. उड्डाणपुलाच्या पिलर क्रमांक ५७ ते ६० दरम्यान दोन महिला नियमितपणे उभ्या राहत असत. तेथून जाणाऱ्या पुरुषांना त्या मुद्दाम थांबवण्याचा प्रयत्न करत, त्यांच्याकडे पाहून अश्लील हावभाव करत, अवमानकारक टिप्पणी करत तसेच टोमणे मारत असल्याचा आरोप आहे. सुरुवातीला अनेकांनी हा प्रकार दुर्लक्षित केला. मात्र दिवसेंदिवस महिलांचा त्रास वाढत गेल्याने स्थानिक नागरिक आणि रेल्वे प्रवाशांमध्ये नाराजी निर्माण झाली.
पुरुषांनी पोलिसांकडे धाव
या प्रकारामुळे संतप्त झालेल्या काही पुरुषांनी अखेर स्थानिक पोलीस ठाण्यात तक्रार दाखल केली. महिलांकडून पुरुषांची छेडछाड होत असल्याची तक्रार मिळाल्यानंतर सुरुवातीला पोलिसांनाही आश्चर्याचा धक्का बसला. मात्र तक्रार गंभीर स्वरूपाची असल्याने पोलिसांनी तत्काळ चौकशी सुरू करण्याचा निर्णय घेतला.
अँटी रोमिओ स्क्वॉडची कारवाई
तक्रारीनंतर उत्तर प्रदेश पोलिसांच्या अँटी रोमिओ स्क्वॉडला संबंधित ठिकाणी पाठविण्यात आले. पोलिसांनी काही काळ गुप्तपणे निरीक्षण केले असता, दोन्ही महिला प्रत्यक्षात येणाऱ्या-जाणाऱ्या पुरुषांकडे अश्लील इशारे करत असल्याचे तसेच त्यांना उद्देशून आक्षेपार्ह टिप्पणी करत असल्याचे निदर्शनास आल्याचे सांगितले जाते.
यानंतर पोलिसांनी तात्काळ कारवाई करत दोन्ही महिलांना ताब्यात घेतले आणि पोलीस ठाण्यात आणले. त्यांच्याविरोधात संबंधित कायदेशीर कलमांनुसार गुन्हा दाखल करण्यात आला आहे.
५० ते ६० पुरुषांना त्रास दिल्याचा आरोप
पोलिसांनी दिलेल्या प्राथमिक माहितीनुसार, अटक करण्यात आलेल्या महिलांपैकी एकीचे वय ४२ वर्षे असून दुसरी २८ वर्षांची आहे. या दोघींनी मिळून सुमारे ५० ते ६० पुरुषांना विविध प्रकारे त्रास दिल्याचा आरोप तक्रारींमध्ये करण्यात आला आहे. पोलिसांकडून या प्रकरणाचा अधिक तपास सुरू असून, इतर पीडितांनीही पुढे येऊन माहिती द्यावी, असे आवाहन करण्यात येत आहे.
सार्वजनिक ठिकाणी छेडछाड कोणाकडूनही असो, गुन्हाच
या घटनेमुळे सार्वजनिक ठिकाणी होणाऱ्या छेडछाडीच्या घटनांबाबत पुन्हा एकदा चर्चा सुरू झाली आहे. समाजात अशा प्रकारचे गुन्हे केवळ पुरुषांकडूनच होतात, अशी धारणा असली तरी कायद्याच्या दृष्टीने कोणत्याही व्यक्तीकडून दुसऱ्याची छेडछाड करणे हा गंभीर गुन्हा आहे. त्यामुळे तक्रारदाराचे लिंग न पाहता प्रत्येक प्रकरणाची निष्पक्ष चौकशी करून आवश्यक ती कारवाई केली जाणे गरजेचे असल्याचे मत व्यक्त होत आहे.
सध्या या दोन्ही महिलांविरुद्ध पुढील कायदेशीर प्रक्रिया सुरू असून, पोलिसांकडून या प्रकरणाचा सखोल तपास केला जात आहे.
