प्रशासनाच्या दुर्लक्षामुळे मदनापूरमध्ये संताप; स्मशानभूमीची व्यवस्था करण्याची ग्रामस्थांची मागणी
यवतमाळ : मृत्यूनंतर तरी सन्मानाने अंत्यसंस्कार व्हावेत, एवढीच प्रत्येक कुटुंबाची अपेक्षा असते. मात्र, यवतमाळ जिल्ह्यातील मदनापूर गावात स्मशानभूमीची व्यवस्था नसल्यामुळे एका ८१ वर्षीय वृद्धावर ग्रामपंचायत कार्यालयाच्या आवारातच अंत्यसंस्कार करण्याची वेळ कुटुंबीयांवर आली. या घटनेमुळे गावातील मूलभूत सुविधांचा प्रश्न पुन्हा एकदा ऐरणीवर आला आहे.
मारेगाव तालुक्यातील मदनापूर येथील रामदास पुरुषोत्तम मानकर (वय ८१) यांचे निधन झाले. मात्र, गावात अंत्यसंस्कारासाठी स्वतंत्र आणि सुरक्षित जागा उपलब्ध नसल्याने त्यांचा अंत्यविधी कुठे करायचा, असा गंभीर प्रश्न कुटुंबीयांसमोर निर्माण झाला.
या परिस्थितीबाबत नाराजी व्यक्त करत त्यांचा मुलगा विजय मानकर यांनी ग्रामपंचायत कार्यालयाच्या प्रांगणातच वडिलांवर अंत्यसंस्कार करण्याचा निर्णय घेतला. ग्रामस्थांनीही या निर्णयाला पाठिंबा दिला. त्यानंतर रामदास मानकर यांच्यावर ग्रामपंचायत कार्यालयाच्या आवारात अंत्यसंस्कार करण्यात आले.
गावात स्मशानभूमीची व्यवस्था करण्यात यावी, यासाठी लोकप्रतिनिधी आणि संबंधित प्रशासकीय यंत्रणांकडे अनेकदा मागणी केल्याचा ग्रामस्थांचा दावा आहे. मात्र, या मागणीची अद्याप दखल घेतली गेली नसल्याने एका कुटुंबाला अशा वेदनादायी परिस्थितीचा सामना करावा लागल्याची भावना ग्रामस्थांनी व्यक्त केली.
विशेषतः पावसाळ्यात अंत्यसंस्कार करताना ग्रामीण भागातील नागरिकांना अनेक अडचणींचा सामना करावा लागतो. रस्त्यावरील चिखल, साचलेले पाणी, अंत्यविधीच्या ठिकाणी छताचा अभाव आणि आवश्यक सुविधांची कमतरता यामुळे दुःखात असलेल्या कुटुंबीयांच्या अडचणी आणखी वाढतात.
एकीकडे सरकारकडून ‘गाव तिथे स्मशानभूमी’ या धोरणाची घोषणा केली जाते; तर दुसरीकडे मदनापूरसारख्या गावांमध्ये अद्याप स्मशानभूमीची मूलभूत सुविधाही उपलब्ध नसल्याचे या घटनेतून समोर आले आहे. त्यामुळे सरकारी धोरणांची प्रत्यक्ष अंमलबजावणी कधी होणार, असा संतप्त सवाल ग्रामस्थांकडून उपस्थित केला जात आहे.
या घटनेची प्रशासनाने तातडीने दखल घेऊन मदनापूर गावासाठी योग्य जागेवर सुसज्ज स्मशानभूमी उभारावी, तसेच अंत्यसंस्कारासाठी निवारा, पाणी, रस्ता आणि आवश्यक सुविधा उपलब्ध करून द्याव्यात, अशी मागणी ग्रामस्थांनी केली आहे. संबंधित प्रशासनाची अधिकृत प्रतिक्रिया मात्र अद्याप समोर आलेली नाही.
