भारतीय सैन्यात निवड झालेल्या प्रणव जाधव या तरुणाचे फलटणचे नगराध्यक्ष समशेरसिंह नाईक निंबाळकर यांनी रात्री अचानक थांबून कौतुक केले. आपला स्वतःचा पेन भेट देत त्यांनी दिलेल्या शाबासकीची शहरात सर्वत्र चर्चा होत आहे.
देशसेवा करण्याचे स्वप्न पूर्ण करून भारतीय सैन्यात निवड झालेल्या एका युवकाचा फलटण शहरात उत्साहात जल्लोष सुरू होता. मात्र, या आनंदोत्सवाला खऱ्या अर्थाने एक वेगळी उंची मिळाली, ती नगराध्यक्ष समशेरसिंह नाईक निंबाळकर यांनी दाखवलेल्या आत्मीयतेमुळे. त्यांच्या एका साध्या पण अत्यंत भावनिक कृतीने उपस्थित युवकांसह सर्व नागरिकांच्या मनात एक विशेष स्थान निर्माण केले असून, शहरभर या हृदयस्पर्शी प्रसंगाची चर्चा सुरू आहे.
दिनांक १५ मे रोजी रात्री नगराध्यक्ष समशेरसिंह नाईक निंबाळकर हे सातारा येथून मुख्यमंत्री देवेंद्र फडणवीस यांचा कार्यक्रम पार पाडून फलटण शहरात परतले होते. शहरात आल्यावर थेट घरी न जाता, सुरू असलेल्या विकासकामांची पाहणी करण्यासाठी ते नगरसेवक संदीप चोरमले यांच्या समवेत रात्रीच्या वेळी बाहेर पडले. ब्राह्मण गल्ली परिसरात सुरू असलेल्या पाण्याच्या पाईपलाईनच्या कामाची पाहणी करण्यासाठी ते मारवाड पेठ मार्गे जात असताना, काही युवक एका तरुणाला खांद्यावर घेऊन जल्लोष करत असल्याचे त्यांना दिसले. रात्रीच्या वेळी सुरू असलेला हा आनंदोत्सव पाहून नगराध्यक्षांनी तात्काळ आपली गाडी थांबवली आणि नेमका काय प्रकार सुरू आहे, याची विचारपूस केली.
यावेळी उपस्थित युवकांनी सांगितले की, हवालदार सुदाम भीमराव जाधव यांचे नातू आणि सुभेदार देवदास जाधव यांचे चिरंजीव प्रणव देवदास जाधव याची भारतीय सैन्यात नुकतीच निवड झाली आहे. सूरज भिसे पाटील यांच्या ‘स्वरूपा अकॅडमी’चा तो विद्यार्थी असून, त्याच्या या यशाचा आनंद मित्रमंडळी साजरा करत आहेत. ही माहिती समजताच नगराध्यक्षांनी प्रणवचे मनापासून अभिनंदन केले व त्याला पुढील वाटचालीसाठी शुभेच्छा दिल्या.
शुभेच्छा देऊन नगराध्यक्ष पुढे निघून गेले होते. मात्र, काही अंतर गेल्यानंतर त्या युवकाच्या यशाबद्दल आणि देशसेवेबद्दलची आदराची भावना त्यांच्या मनात अधिक दृढ झाली. त्यांनी पुन्हा गाडी थांबवली आणि ते युवकांजवळ आले. त्यांनी प्रणवला जवळ बोलावले, आपल्या खिशातील पेन काढला आणि तो प्रणवच्या कुडत्याच्या कॉलरला लावला. पाठीवर शाब्बासकीची थाप मारत ते अत्यंत भावनिक शब्दांत म्हणाले, “माझ्याकडे तुला देण्यासाठी आत्ता काही नाही, पण माझ्याकडे हे पेन आहे. हेच तुला भेट म्हणून देतो. देशसेवेत मोठं नाव कमव.”
नगराध्यक्ष समशेरसिंह नाईक निंबाळकर यांच्या या अनपेक्षित आणि मनाला भिडणाऱ्या कृतीमुळे उपस्थित सर्व युवक भारावून गेले. काही क्षणांसाठी तिथे अतिशय भावनिक वातावरण निर्माण झाले होते. उपस्थित तरुणांनी टाळ्यांच्या गजरात नगराध्यक्षांच्या या कृतीला दाद दिली. त्यानंतर युवकांच्या विनंतीवरून नगराध्यक्षांनी अत्यंत आपुलकीने सर्वांसोबत एक छायाचित्रही (फोटो) काढले.
कोणताही दिखावा न करता एका सामान्य सैनिकाच्या मुलाच्या यशाला लोकप्रतिनिधीने दिलेला हा सन्मान अनेकांच्या मनाला भावला आहे. सोशल मीडियावरही या प्रसंगाचे मोठे कौतुक होत असून, फलटणमधील युवकांमध्ये भारतीय सैन्याबद्दल असलेला अभिमान आणि देशसेवेची भावना या निमित्ताने पुन्हा एकदा अधोरेखित झाली आहे.
