मुंबईत विधान परिषद निवडणुकीवर अटीतटीचा सामना सुरू आहे. महाविकास आघाडीत काँग्रेस आणि उद्धव सेनेत ताणतणाव वाढला आहे. दोन्ही पक्षात बैठक सुरू असली तरी समाधानकारक तोडगा निघालेला नाही.
त्याचवेळी पुण्यातही उद्धव सेनेने मोठा डाव टाकला आहे. महाराष्ट्र नवनिर्माण सेनेला जे करता आले नाही, ते ठाकरे सेनेने पुण्यनगरीत करून दाखवलं. वसंत मोरे यांना त्यांनी मोठं पद दिलं आहे. विद्येच्या माहेरघरात पक्ष मजबुतीसाठी मोठा प्रयत्न केला आहे.
वसंत मोरेंवर उद्धव ठाकरे यांनी मोठी जबाबदारी दिली आहे. मोरे यांना पुण्याचे शहर प्रमुख पद देण्यात आले आहे. आज सकाळीच ठाकरे सेनेकडून ही घोषणा करण्यात आली आहे. माझ्यावर उद्धव ठाकरे यांनी विश्वास ठेवला, त्या बद्दल मी उद्धव ठाकरे यांचे आभार मानतो. त्यांनी मला ही संधी दिली. विरोधी पक्ष म्हणून उद्धव बाळासाहेब ठाकरे पक्ष म्हणून काम करेल, अशी प्रतिक्रिया मोरे यांनी दिली आहे.
संजय राऊत यांचा सकाळी मला कॉल आला होता. त्यांनी सांगितलं की पक्ष मजबूत करा. मी सांगितलं आहे की तुमच्या अपेक्षाहून जास्त काम करेल. मी पक्षात आलेली मरगळ झटकून काम करायला लागेल. मला सगळ्या विधानसभेत जनता दरबार घ्यायचे आहेत. जुन्या लोकांना पण मी सोबत घेऊन काम करेल. मी दोन दिवसात मातोश्रीवर जाऊन उद्धव ठाकरे यांची भेट घेणार आहे, असे वसंत मोरे यांनी सांगितले.
काल परवा संजय राऊत पुण्यात होते. त्यांनी उद्धव सेनेचा मेळावा घेतला. आगामी तीन वर्षात आता कुठल्याच निवडणुका नाहीत. अशावेळी शिवसेनेचे संघटनात्मक काम तळागाळापर्यंत पोहचवा असे आवाहन त्यांनी केले. लोकांमधील मिसिंग लिंकचा शोध घेऊन सेनेचे काम केले, तर पुण्यात शिवसेना एक्सप्रेसवे प्रमाणे सुसाट धावेल असा विश्वास त्यांनी व्यक्त केला. त्यांनी पक्षात घटनात्मक बदलाबाबतही संकेत दिले. आता पुण्याच्या शहरप्रमुखपदी वसंत मोरे यांनी नियुक्ती करण्यात आली आहे. पिंपरी चिंचवड शहरप्रमुखपदी चेतन पवार यांची नियुक्ती करण्यात आली आहे. नितीन गावडे हे शहर समन्वयक असतील. तर संजय मोरे, गजानन थरकुडे हे सहसंपर्कप्रमुख असतील. गौतम चाबुकस्वार यांच्याकडे पिंपरी चिंचवड सह संपर्क प्रमुख पद असेल
