मुंबईतील वरळीत भाजपच्या महिला आरक्षण मोर्चादरम्यान राज्याचे जलसंपदा मंत्री गिरीश महाजन आणि मुंबई पोलिसांसोबत झालेली हमरीतुमरी आता पोलिस स्टेशनपर्यंत पोहोचली आहे.
रस्ते बंद असल्याने संतापलेल्या एका महिलेने थेट मंत्री गिरीश महाजन यांना ‘गेट आऊट’ म्हणत झापले होते. गिरीश महाजन यांनी या महिलेला माफ केले असले, तरी आता प्रख्यात वकील गुणरत्न सदावर्ते यांची कन्या झेन सदावर्ते हिने या प्रकरणात उडी घेतली आहे. लोकप्रतिनिधी आणि पोलिसांचा अपमान खपवून घेणार नाही, म्हणत झेनने या महिलेविरुद्ध वरळी पोलिस स्टेशनमध्ये तक्रार दाखल केली असून, या प्रकरणाला आता अनपेक्षित कायदेशीर वळण मिळाले आहे.
मुंबईतील वरळी (Worli) भागात 21 एप्रिल रोजी भाजपतर्फे जन आक्रोश मोर्चाचे आयोजन करण्यात आले होते. महिला आरक्षण विधेयकावरून विरोधकांच्या निषेधार्थ हा मोर्चा काढण्यात आला होता. या मोर्चामुळे वरळी परिसरात प्रचंड वाहतूक कोंडी झाली होती. अनेक नागरिक तासनतास ट्रॅफिकमध्ये अडकले होते. दरम्यान, आपल्या मुलाला शाळेतून आणण्यासाठी निघालेली एक महिला या ट्रॅफिकमध्ये अडकली होती. सुमारे एक तास एकाच ठिकाणी अडकून पडल्याने या महिलेचा संयम सुटला. ती गाडीतून उतरली आणि थेट आंदोलनाच्या मध्यभागी गेली.
तिथे उपस्थित असलेले मंत्री गिरीश महाजन यांच्यासमोर जात तिने आपला संताप व्यक्त केला. तिने Get out of here (येथून चालते व्हा), तुम्ही ट्रॅफिक जॅम करत आहात आणि बाजूला मैदान रिकामं असताना रस्त्यावर का येता? असे सवाल उपस्थित महिलेने गिरीश महाजन यांच्यासह मुंबई पोलिसांची कानउघाडनी केली होती. या घटनेचा व्हिडिओ सोशल मीडियावर प्रचंड व्हायरल झाला.
व्हिडिओ व्हायरल झाल्यानंतर गिरीश महाजन यांनी सामंजस्याची भूमिका घेत महिलेची भाषा चुकीची होती तरीही आम्ही तिच्यावर कारवाई करणार नाही, असे म्हटले होते. मात्र, आता झेन सदावर्ते यांनी या प्रकरणात उडी घेतली आहे.
भररस्त्यात एका मंत्र्याला अशा प्रकारे ‘गेट आऊट’ म्हणणे आणि अपमानित करणे हे लोकशाही मूल्यांच्या विरोधात आहे, असे झेन सदावर्ते यांनी पोलिसांत दिलेल्या तक्रारीत म्हटलं आहे. झेनच्या दाव्यानुसार, अशा प्रकारे गर्दीच्या ठिकाणी मंत्र्यांसोबत हुज्जत घातल्यामुळे गोंधळ निर्माण होऊन तिथे चेंगराचेंगरी होण्याची शक्यता होती.
पोलिसांच्या कामात अडथळा आणणे आणि घटनात्मक पदावर असलेल्या व्यक्तीला धमकावणे यासाठी या महिलेवर एफआयआर (FIR) दाखल करावा, अशी मागणी झेनने केली आहे. ही घटना नैसर्गिक संताप नसून प्रसिद्धीसाठी केलेली ‘स्टंटबाजी’ असू शकते का, असाही संशय तिने तक्रारीत व्यक्त केला आहे.
या तक्रारीमुळे आता वरळी पोलिसांनी या प्रकरणाची चौकशी सुरू केली असून, त्या सामान्य महिलेच्या अडचणीत वाढ होण्याची शक्यता निर्माण झाली आहे.
