मध्य रेल्वेने ठाणे ते कल्याण आणि कुर्ला ते वाशीदरम्यान रविवारी ब्लॉक घोषित केला आहे. पश्चिम रेल्वेवर चर्चगेट ते मुंबई सेंट्रलदरम्यान ब्लॉक घेण्यात येणार आहे.
मध्य रेल्वे
स्थानक : ठाणे ते कल्याण
मार्ग : अप आणि डाऊन जलद
वेळ : सकाळी १०.४० ते दुपारी ३.४०
परिणाम : ब्लॉकवेळेत अप आणि डाऊन जलद मार्गावरील लोकल फेऱ्या अप आणि डाऊन धीम्या मार्गावर वळवण्यात येणार आहेत. यामुळे काही लोकल फेऱ्या रद्द करण्यात येणार असून, काही फेऱ्या २० मिनिटे विलंबाने धावणार आहेत.
हार्बर रेल्वे
स्थानक : कुर्ला ते वाशी
मार्ग : अप आणि डाऊन
वेळ : सकाळी ११.१० ते दुपारी ४.१०
परिणाम : सीएसएमटी ते वाशी/बेलापूर/पनवेलदरम्यान अप आणि डाऊन मार्गावरील लोकल फेऱ्या रद्द राहणार आहेत. सीएसएमटी ते कुर्ला आणि वाशी ते पनवेलदरम्यान विशेष लोकल फेऱ्या चालवण्यात येणार आहेत.
पश्चिम रेल्वे
स्थानक : चर्चगेट ते मुंबई सेंट्रल
मार्ग : अप आणि डाऊन जलद
वेळ : सकाळी १०.३५ ते दुपारी ३.३५
परिणाम : ब्लॉकवेळेत अप आणि डाऊन जलद मार्गावरील लोकल फेऱ्या अप आणि डाऊन धीम्या मार्गावर वळवण्यात येणार आहेत. काही लोकल दादर आणि वांद्रे स्थानकापर्यंत चालवून तेथूनच परतीच्या प्रवासासाठी रवाना करण्यात येतील. यामुळे काही लोकल फेऱ्या रद्द करण्यात येणार असून, काही फेऱ्या विलंबाने धावणार आहेत.
धुरामुळे मध्य रेल्वे विस्कळीत
मध्य रेल्वेच्या कळवा आणि ठाणे रेल्वे स्थानकादरम्यान रुळालगत साचलेल्या कचऱ्याला शुक्रवारी सायंकाळी आग लागली. या आगीमुळे तब्बल अर्धा तास मध्य रेल्वेच्या मुख्य मार्गावरील लोकल वाहतूक विस्कळीत झाली. अग्निशमन दलाने आगीवर नियंत्रण मिळवल्यानंतर या मार्गावरील वाहतूक सुरळीत झाली.
सिग्नल बिघाडामुळे हार्बर खोळंबली
हार्बर मार्गावरील प्रवाशांना सिग्नल बिघाडामुळे शुक्रवारी प्रचंड मनस्ताप सहन करावा लागला. खांदेश्वर आणि मानसरोवर स्थानकांदरम्यान अप आणि डाउन मार्गावरील तब्बल चार सिग्नलमध्ये बिघाड झाल्यामुळे लोकल वेळापत्रक पूर्णपणे कोलमडले. दुपारी कार्यालयीन वेळेत हा प्रकार घडल्याने स्थानकांवर प्रवाशांची मोठी गर्दी झाली होती.
