महाराष्ट्राच्या राजकारणात सध्या एका नव्या वादळाची सुरुवात झाली आहे. राष्ट्रवादी काँग्रेस पक्षाचे (अजित पवार गट) नेते आणि माजी उपमुख्यमंत्री अजित पवार यांच्या पत्नी सुनेत्रा पवार आज (31 जानेवारी) दुपारी 5 वाजता महाराष्ट्राच्या पहिल्या महिला उपमुख्यमंत्री म्हणून शपथ घेणार आहेत.
मात्र, या शपथविधीच्या पार्श्वभूमीवर अजित पवारांचे ज्येष्ठ चिरंजीव पार्थ पवार (Parth Pawar) यांना या कार्यक्रमाला उपस्थित राहू नये, असा स्पष्ट संदेश भारतीय जनता पक्षाकडून (BJP) देण्यात आला आहे. यामागे पार्थ पवारांवरील पुण्यातील भूखंड प्रकरणातील सुरू असलेली चौकशी आणि संबंधित समितीचा अहवाल आहे.
याच प्रकरणामुळे पार्थ पवार स्टेजवर आल्यास भाजपच्या प्रतिमेला धक्का बसू शकतो, असा अंदाज वर्तवण्यात येत आहे. त्यामुळे पक्षश्रेष्ठींनी पार्थ पवारांना या कार्यक्रमापासून दूर राहण्याच्या सूचना दिल्या असल्याचं समजतं आहे. सुनेत्रा पवारांच्या शपथविधीची तयारी मुंबईतील राजभवनात जोरात सुरू आहे. राष्ट्रवादी काँग्रेस पक्षाच्या विधिमंडळ गटाच्या बैठकीत सुनेत्रा पवारांना नेते म्हणून निवडण्यात आले आहे. मुख्यमंत्री देवेंद्र फडणवीस यांनीही पक्षाच्या निर्णयाला पाठिंबा दर्शवला आहे. मात्र, या कार्यक्रमाच्या पार्श्वभूमीवर पार्थ पवारांच्या भूमिकेवर चर्चा सुरू आहे.
भाजपच्या उच्चपदस्थ सूत्रांनी दिलेल्या माहितीनुसार, पार्थ पवारांना या कार्यक्रमात सहभागी होऊ नये, असा स्पष्ट मेसेज देण्यात आला होता. यामागे पुण्यातील भूखंड प्रकरणातील चौकशीचा मुद्दा महत्त्वाचा आहे.
काय आहे भूखंड प्रकरण?
पुण्यातील एका सरकारी जमिनीच्या विक्री प्रकरणात पार्थ पवारांच्या अमेडिया एंटरप्रायझेस एलएलपी कंपनीचा संबंध आहे. या जमिनीची बाजारभाव 1804 कोटी रुपये असताना ती केवळ 300 कोटी रुपयांना विकली गेली. ही जमीन ‘महार वतन’ प्रकारची असून या व्यवहारात अनियमितता असल्याचा आरोप आहे. पुणे पोलिसांच्या आर्थिक गुन्हे शाखेने या प्रकरणात शीतल तेजवानी या महिलेला अटक केली होती. ज्या या जमिनीच्या पॉवर ऑफ अॅटर्नी होत्या. तसेच, निलंबित उपनिबंधक रवींद्र तरू यांनाही अटक झाली आहे. दरम्यान, या जमीन व्यवहारात पार्थ पवार यांचं नाव प्रामख्याने समोर आलं होतं. मात्र, पोलिसांनी दाखल केलेल्या गुन्ह्यात पार्थ पवार यांच्या नावाचा समावेश करण्यात आला नव्हता. मात्र, असं असलं तरीही या प्रकरणाचा अंतिम चौकशी अहवाल आलेला नाही.
या प्रकरणाची चौकशी अद्याप सुरू आहे. राज्य सरकारने संबंधित चौकशी समितीचा अहवाल मागवला आहे. पार्थ पवार हे अमेडिया कंपनीचे 99% भागीदार आहेत, तरीही एफआयआरमध्ये त्यांचे नाव नाही. मात्र, दिग्विजय पाटील आणि इतर सहकाऱ्यांचा उल्लेख आहे. सामाजिक कार्यकर्त्या अंजली दमानिया यांनी पार्थ पवारांच्या भूमिकेवर प्रश्न उपस्थित केले आहेत.
या प्रकरणाने महाराष्ट्राच्या राजकारणात खळबळ उडवली होती. विशेषतः अजित पवारांच्या निधनानंतर राष्ट्रवादी पक्षातील उत्तराधिकाराच्या चर्चेत.
भाजपची भूमिका आणि राजकीय परिणाम
भाजप आणि राष्ट्रवादी काँग्रेस (अजित पवार गट) हे महायुतीचे घटक पक्ष आहेत. अजित पवारांच्या निधनानंतर सुनेत्रा पवारांना उपमुख्यमंत्री पद देण्याच्या निर्णयाला भाजपने पाठिंबा दिला आहे. मात्र, पार्थ पवारांच्या उपस्थितीमुळे पक्षाच्या प्रतिमेला धक्का बसू शकतो, असा अंदाज भाजपच्या नेत्यांनी वर्तवला आहे. जमीन प्रकरणातील चौकशी सुरू असल्याने पार्थ पवार शपथविधी सोहळ्याला उपस्थित राहिल्यास विरोधकांना टीकेचे नवे आयुध मिळू शकते. त्यामुळे भाजपच्या पक्षश्रेष्ठींनी पार्थ पवारांना कार्यक्रमापासून दूर राहण्याच्या सूचना दिल्या असल्याचं समजतं आहे.
दुसरीकडे शरद पवार यांनी सकाळीच घेतलेल्या पत्रकार परिषदेत म्हटलं होतं की, सुनेत्रा पवारांच्या शपथविधीबाबत आपल्याला काहीही माहित नाही. यामुळे राष्ट्रवादी पक्षातील दोन गटांमधील एकीच्या चर्चांना नवे वळण मिळाले आहे.
भविष्यातील शक्यता
पार्थ पवारांच्या राजकीय भवितव्यावर या प्रकरणाचा परिणाम होऊ शकतो. काही सूत्रांकडून अशी चर्चा आहे की, सुनेत्रा पवार उपमुख्यमंत्री झाल्यानंतर त्या राज्यसभेची जागा सोडतील आणि पार्थ पवारांना राज्यसभेत पाठवले जाईल. मात्र, जमीन प्रकरणातील चौकशी पूर्ण होईपर्यंत पार्थ पवारांना सावध भूमिका घ्यावी लागेल. भाजपच्या दृष्टिकोनातूनही, महायुती सरकारच्या प्रतिमेला कोणताही डाग लागू नये, यासाठी ही खबरदारी घेण्यात आली आहे. या प्रकरणाने महाराष्ट्राच्या राजकारणात नव्या चर्चांना जन्म दिला आहे. भूखंड प्रकरणाची चौकशी कशाप्रकारे पुढे जाते आणि त्याचा पार्थ पवारांच्या राजकीय कारकीर्दीवर काय परिणाम होतो, हे पाहणे उत्सुकतेचे ठरेल.
