मालाड रेल्वे स्थानकात चर्चगेट-बोरिवली या धीम्या लोकलमधील सामान्य डब्यातून प्रवास करणारे मुंबईचे रहिवासी असलेले गणिताचे प्राध्यापक अलोक कुमार सिंग यांची गेल्या आठवड्यात किरकोळ वादातून हत्या झाली. यासाठी वापरण्यात आलेला साडेसोळा सेंटिमीटरचा चिमटा रेल्वे पोलिसांनी हस्तगत केला आहे. आता या प्रकरणातील प्रत्यक्षदर्शींचा शोध घेण्यासाठी कृत्रिम प्रज्ञाची (ए आय) मदत घेण्यात येत आहे. आरोपी ओमकार शिंदे याला पोलिसांनी या आधीच बेड्या ठोकल्या आहेत.
एआयच्या मदतीने प्रत्यक्षदर्शींचा शोध
मालाड दुर्घटनेनंतर आरोपीचा शोध घेण्यासाठी रेल्वे स्थानकातील सीसीटीव्हीची तपासणी करण्यात आली. त्यानंतर रेल्वे स्थानक परिसरातूनच आरोपीला ताब्यात घेण्यात आले. लोकलमध्ये मोठी गर्दी असल्याने आणि अनेक प्रवासी उतरून गेल्यामुळे प्रत्यक्षदर्शींचा शोध घेणे पोलिसांसमोर मोठे आव्हान ठरत आहे. रेल्वे स्थानकातील सीसीटीव्हीमध्ये ‘एआय’आधारित चेहरा ओळखण्याचे तंत्रज्ञान आहे. त्याच्या साह्याने प्रत्यक्षदर्शी शोधून त्यांची साक्ष नोंदवण्याचा प्रयत्न सुरू आहे.
चिमटा स्टेशनच्या पत्र्यावर भिरकावला
दरम्यान, आरोपीने वार केल्यानंतर पुलावरून पळत असताना चिमटा मालाड पूर्वेकडील स्थानकातील पत्र्यावर भिरकावला होता. इमिटेशन दागिन्यासाठी वापरला जाणारा हा साडेसोळा सेंटिमीटरचा चिमटा रेल्वे पोलिसांनी हस्तगत केला आहे. आरोपी आणि हत्यार ताब्यात घेण्यात आले आहे. आता केवळ प्रत्यक्षदर्शींची साक्ष नोंदवून आरोपपत्र दाखल करण्यात येणार आहे. डब्यात खूप गर्दी होती. त्यामुळे साक्षीदाराचा शोध घेण्यासाठी दुर्घटना घडलेल्या लोकलमध्ये पोलिसांकडून तपासणी सुरू आहे. त्याचबरोबर सीसीटीव्हीत असलेल्या प्रवाशांशी संपर्क साधण्याचा प्रयत्न केला जात आहे.
काय घडलं होतं नेमकं?
शनिवार, २४ जानेवारीला चर्चगेटहून सायंकाळी ४.४६ वाजता सुटलेल्या बोरिवली धीम्या लोकलच्या सामान्य डब्यात प्रवासादरम्यान किरकोळ कारणावरून प्रवाशांमध्ये वाद झाला. महिलांसमोर झालेल्या अपमानामुळे ओमकार संतापल्याचे बोलले जाते. त्यामुळे हा वाद काही क्षणांतच हिंसक झाला आणि त्यातून आरोपी ओमकार शिंदे हा अलोकच्या पोटात धारदार चिमट्याने वार करत फरार झाला होता.
