राज्याच्या राजकारणात आज दिवसभरात घडलेल्या घडामोडींनी मोठी खळबळ उडवली असून, राष्ट्रवादी काँग्रेसच्या गोटातून एक ऐतिहासिक निर्णय समोर आला आहे. सुनेत्रा पवार या उद्या उपमुख्यमंत्रिपदाची शपथ घेणार असून, त्यामुळे महाराष्ट्राला पहिल्यांदाच महिला उपमुख्यमंत्री मिळणार आहेत.
उद्या सकाळी अचूक ११ वाजता राष्ट्रवादी काँग्रेस पक्षाच्या सर्व आमदारांची मुंबईत एक अत्यंत महत्त्वाची बैठक आयोजित करण्यात आली आहे. या बैठकीनंतर सायंकाळी राजभवनात सुनेत्रा पवार यांचा उपमुख्यमंत्री म्हणून शपथविधी पार पडणार असल्याची खात्रीशीर माहिती समोर येत आहे.
विश्वसनीय सूत्रांनी दिलेल्या माहितीनुसार, अजित पवार यांचे राजकीय सल्लागार नरेश अरोरा यांनी सुनेत्रा पवार यांच्याशी सविस्तर चर्चा केली असून, उपमुख्यमंत्रिपदाची जबाबदारी स्वीकारण्यास त्यांनी होकार दिला आहे. या चर्चेनंतरच त्यांच्या नावावर शिक्कामोर्तब करण्यात आले आहे.
दरम्यान, या घडामोडींच्या पार्श्वभूमीवर राष्ट्रवादी काँग्रेसच्या वरिष्ठ नेत्यांची हालचाल वाढली होती. पक्षाचे दिग्गज नेते छगन भुजबळ, सुनील तटकरे, धनंजय मुंडे आणि प्रफुल्ल पटेल हे मुख्यमंत्री देवेंद्र फडणीस यांची भेट घेण्यासाठी वर्षा निवासस्थानी दाखल झाले होते. वर्षा निवासस्थानी झालेल्या बंदद्वार बैठकीनंतर अखेर सुनेत्रा पवार यांच्या नावावर उपमुख्यमंत्रिपदासाठी अधिकृत शिक्का बसल्याचे स्पष्ट झाले.
याचदरम्यान, राष्ट्रवादी काँग्रेसचे प्रदेशाध्यक्ष सुनील तटकरे हे पक्षाचे कार्याध्यक्ष प्रफुल्ल पटेल यांच्या निवासस्थानी दाखल झाले असून, दोन्ही नेत्यांमध्ये सध्या महत्त्वाची बैठक सुरू आहे. उद्या सकाळी होणाऱ्या आमदारांच्या बैठकीत गटनेत्याची निवड, पुढील राजकीय दिशा आणि सरकारमधील भूमिका यावर सविस्तर चर्चा होणार आहे.
एकूणच, उपमुख्यमंत्रिपदाची सूत्रे सुनेत्रा पवार यांच्या हाती जाण्याच्या पार्श्वभूमीवर राष्ट्रवादी काँग्रेसमध्ये नव्या पर्वाची सुरुवात होत असल्याचे चित्र आहे. महाराष्ट्राच्या राजकारणात हा निर्णय ऐतिहासिक ठरणार, यात शंका नाही.
