महाबळेश्वरच्या केटस् पॉइंटवरून 400 फूट खोल दरीत उडी मारून 18 वर्षांच्या तरूणाने आपल्या आयुष्याची अखेर केल्याची घटना उघडकीस आली आहे. भगवतसिंह मदनसिंह सोळंकी (रा. ढेबेवाडी, ता. पाटण), असं मृत मुलाचे नाव असल्याची माहिती आहे. तो पाटण तालुक्यातील ढेबेवाडी गावातील रहिवासी होता. त्याने सीईटी परीक्षेचा फॉर्म भरला नव्हता. त्या नैराश्यातून त्याने हे टोकाचे पाऊल उचललं असावं, असा ढेबेवाडी पोलिसांनी संशय आहे.
मूळचे राजस्थानचे असलेले सोळंकी कुटुंब व्यवसायाच्या निमित्ताने गेल्या 20 वर्षांपासून ढेबेवाडीमध्ये स्थायिक आहे. ढेबेवाडी बाजारपेठेत त्यांचा बेकरी आणि स्वीट्सचा व्यवसाय आहे. याच कुटुंबातील भगवतसिंह सोळंकी हा 18 वर्षांचा तरूण महाविद्यालयीन शिक्षण घेत होता. त्याने सीईटीचा फॉर्म भरला नव्हता. त्यामुळे तो नैराश्यात होता. फॉर्म न भरण्याचे कारण मात्र स्पष्ट झालेले नाही.
भगवतसिंह सोळंकी हा शुक्रवारी (23 जानेवारी) कोणाला काहीही न सांगता घरातून निघून गेला होता. तेव्हापासून तो बेपत्ता होता. कुटुंबीयांनी शोधाशोध करूनही त्याचा थांगपत्ता लागत नव्हता. म्हणून मुलगा बेपत्ता असल्याची तक्रार कुटुंबीयांनी ढेबेवाडी पोलीस ठाण्यात दिली होती. मिसिंगचा मेसेज सातारा जिल्ह्यातील सर्व पोलीस ठाण्यात गेला होता. त्याच्या मोबाईलचे लोकेशन महाबळेश्वरच्या केट्स पॉइंट परिसरात दाखवत होते. त्यामुळे पाचगणी पोलिसांनी सह्याद्री ट्रेकर्स, प्रतापगड सर्च अँड रेस्क्यू टीम आणि महाबळेश्वर ट्रेकर्सना पाचारण केले.
महाबळेश्वर ट्रेकर्सचे सुनील भाटिया, सुनील केळगणे, जयवंत बिरामने, पृथ्वी बिरामने, सौरभ गोळे, सौरव सालेकर, अक्षय नाविलकर, विशू सपकाळ, आतेश धनावडे, प्रतापगड सर्च अँड रेस्क्यू टीमचे अनिकेत वागदरे, आशिष बिरामने यांनी केट्स पॉइंटवरील 400 फूट खोल दरीत उतरल्या. त्यावेळी त्यांना 18 वर्षांच्या मुलाचा मृतदेह सापडला. मृतदेह दरीतून वर आणल्यानंतर पाचगणी पोलिसांनी तो शवविच्छेदनासाठी शासकीय रुग्णालयात पाठवला.
शवविच्छेदनानंतर मृतदेह कुटुंबियांच्या ताब्यात देण्यात आला. मदनसिंह सोळंकी यांच्या दोन मुलांपैकी थोरला मुलगा डॉक्टर आहे तर भगवतसिंह हा महाविद्यालयीन शिक्षण घेत होता. ढेबेवाडीचे सहाय्यक पोलीस निरीक्षक पी. एस. डाईंगडे यांच्या मार्गदर्शनाखाली हवालदार धीरज मुळे हे या घटनेचा अधिक तपास करत आहेत.
