हळदी कुंकवाच्या कार्यक्रमासाठी दुचाकीने जात असताना नागपूर–भंडारा महामार्गावर महालगावजवळ नाग नदीच्या पुलावर झालेल्या भीषण अपघातात दोन मामे, आते बहिणींचा दुर्दैवी मृत्यू झाला. अलिशा मेहर आणि मोनाली घाटोळे अशी मृत तरुणींची नावे असून, या घटनेमुळे संपूर्ण परिसरात शोककळा पसरली आहे. आनंदाच्या कार्यक्रमाला निघालेल्या दोघींवर काळाने अचानक घाव घातल्याने दोन्ही कुटुंबांवर दुःखाचा डोंगर कोसळला आहे.
मिळालेल्या माहितीनुसार, अलिशा मेहर आणि मोनाली घाटोळे या दोघी भुगाव येथे आयोजित हळदी कुंकवाच्या कार्यक्रमासाठी दुचाकीने जात होत्या. नागपूर भंडारा महामार्गावरील महालगावजवळ नाग नदीच्या पुलावर पोहोचताच मागून येणाऱ्या एका भरधाव वाहनाने त्यांच्या दुचाकीला जोरदार धडक दिली. ही धडक इतकी तीव्र होती की दोघीही रस्त्यावर फेकल्या गेल्या आणि गंभीर जखमी झाल्या.
या भीषण अपघातात अलिशा मेहर यांचा जागीच मृत्यू झाला. तर गंभीर जखमी अवस्थेत असलेल्या मोनाली घाटोळे यांना तत्काळ उपचारासाठी नागपूरकडे हलवण्यात आले. मात्र उपचारासाठी नेत असतानाच वाटेतच मोनालीनेही प्राण सोडले. अपघाताची माहिती मिळताच पोलिसांनी घटनास्थळी धाव घेतली, अपघातग्रस्त वाहने बाजूला करून वाहतूक सुरळीत केली आणि प्रकरणाची नोंद घेतली. मृतदेह शासकीय रुग्णालयात पोस्टमार्टमसाठी पाठवण्यात आले असून पुढील तपास सुरू आहे.
मृतक अलिशा मेहर या पिपळा डाक बंगला परिसरातील रहिवासी होत्या. अलिशाचा अवघ्या सात महिन्यांपूर्वीच विवाह झाला होता. संसाराची नवी स्वप्ने रंगवताना अचानक आलेल्या या अपघाताने तिच्या कुटुंबावर मोठा आघात केला आहे. तर मोनाली घाटोळे हिचा विवाह येत्या २६ फेब्रुवारीला होणार होता. घरात लग्नाची लगबग सुरू होती, लग्नाची खरेदी आणि तयारी अंतिम टप्प्यात होती. मात्र लग्नाआधीच तिच्या आयुष्याचा अंत झाल्याने नातेवाईकांवर दुःखाचा डोंगर कोसळला.
आनंद, उत्साह आणि सणासुदीच्या वातावरणात सहभागी होण्यासाठी निघालेल्या या दोघी बहिणींचा असा अंत झाल्याने परिसरात हळहळ व्यक्त केली जात आहे. या दुर्दैवी घटनेने दोन कुटुंबांवर दुःखाचा डोंगर कोसळला असून संपूर्ण परिसर शोकमग्न झाला आहे.
