बंगळुरूमध्ये फसवणुकीचा एक भयंकर प्रकार समोर आला आहे. विवाहित पुरूषाने एका सॉफ्टवेअर इंजिनिअर महिलेची लग्नाचे आमिष देत 1.5 कोटी रुपयांपेक्षा अधिकची फसवणूक केली आहे. याप्रकरणी पोलिसांनी गुन्हा दाखल करून तपास सुरू केला आहे.
याप्रकरणी व्हाईटफील्डमध्ये राहणाऱ्या या महिला सॉफ्टवेअर इंजिनिअरने पोलिसांत तक्रार दाखल केली. तिने आरोप केला आहे की, तिला एका मॅट्रिमोनियल साइटवर भेटलेल्या एका पुरूषाने तिची 1.53 कोटी रुपयांपेक्षा अधिकची फसवणूक केली. मार्च 2024 मध्ये, या महिलेची मॅट्रिमोनियल प्लॅटफॉर्मवर विजय राज गौडा नावाच्या एका व्यक्तीशी भेट झाली होती. तिचा विश्वास संपादन करण्यासाठी विजयने स्वतःची ओळख एका उच्चभ्रू व्यावसायिक म्हणून करून दिली, ज्याच्याकडे व्हीआरजी एंटरप्रायझेस नावाची कंपनी होती, ज्याच्याकडे बंगळुरूच्या राजाजीनगर आणि सदाशिवनगरमध्ये ट्रक, दगड क्रशर आणि प्रमुख रिअल इस्टेट मालमत्ता होत्या.
हे पटवून देण्यासाठी त्याने 2019 च्या अंमलबजावणी संचालनालय (ईडी) च्या एका प्रकरणातील एक कागदपत्र शेअर केले ज्यामध्ये विजयला आरोपी म्हणून सांगण्यात आले होते. या कागदपत्राचा वापर करून, आरोपीने कथितपणे गोठवलेल्या मालमत्तेचा खुलासा केला आणि दावा केला की त्याची एकूण संपत्ती 715 कोटी होती.
लग्नाबाबत निश्चित झाल्यानंतर मात्र, तिचे आर्थिक शोषण सुरू झाले. एप्रिल 2024 मध्ये 15000 रुपये मागण्यापासून याची सुरुवात झाली होती, हळूहळू मागण्या वेगाने वाढत गेल्या. विजयने सॉफ्टवेअर इंजिनिअरला संयुक्त व्यवसाय गुंतवणुकीच्या बहाण्याने कर्ज घेण्यास आणि मित्र आणि कुटुंबाकडून पैसे मागण्यास भाग पाडले. यादरम्यान तिने तिच्या सहकाऱ्यांकडून आणि मित्रांकडून 89 लाख आणि तिच्या आईच्या निवृत्ती बचतीसह तिच्या पालकांकडून 28 लाख रुपये घेतले होते.
इतकंच नाही तर त्याच्या म्हणण्यावरुन तिने आपल्या दागिनेही गहाण ठेवले, ज्याचे 10 लाख रुपये मिळाले. पीडितेने एचडीएफसी, कॅनरा, आयसीआयसीआय आणि बँक ऑफ बडोदा येथील पाच वेगवेगळ्या बँक खात्यांचा वापर करून आरोपीला एकूण 1,75,66,890 इतके रुपये दिले. त्यातले त्याने तिला 22.5 लाख परत केले होते. मात्र, अजूनही आरोपीकडे 1.5 कोटींपेक्षा जास्त रक्कम कलेली आहे.
