पुण्यात वाहतुकीचा वेग वाढल्याचे निरीक्षण वाहतूक पोलिसांनी काही दिवसांपूर्वीच नोंदविले असताना, जगातील कोंडीमुक्त शहरांच्या यादीतही पुण्याने अंशतः सुधारणा केली आहे. वाहतूक कोंडीत गेल्या वर्षी जगात चौथ्या क्रमांकावर असलेल्या पुण्याला २०२५मध्ये पाचव्या क्रमांकाचे स्थान मिळाले आहे. जगात सर्वाधिक वाहतूक कोंडीत बेंगळुरू दुसऱ्या क्रमांकावर असून, मुंबई १८व्या स्थानावर आहे.
जगात अनेक मोठ्या शहरांमधील वाढती वाहतूक ही सर्वांचीच समस्या झाली आहे. जगभरातील प्रत्येक मोठ्या शहरात वाहनांची संख्या वाढल्याने कमी अंतर कापण्यासाठी संस्थेकडून जगातील ४९२ शहरांमधील वाहतुकीची माहिती गोळा करून त्याचे विश्लेषण करून सविस्तर अहवाल तयार केला जातो. ‘टॉम टॉम’तर्फे ‘ट्रॅफिक इंडेक्स २०२५’ या अहवालात जगभरातील वाहनांचा वेग मोजण्यासाठी ‘जीपीएस डेटा’चा आधार घेण्यात आला आहे.
देशात सर्वाधिक वाहतूक कोंडीमध्ये पहिल्या दहामध्ये बेंगळुरू असून, जागतिक स्तरावर ४९२ शहरांमधून पहिल्या ५० शहरांमध्ये बेंगळुरू, पुण्यासह हैदराबाद, चेन्नई, जयपूर, कोलकता, नवी दिल्ली यांचा समावेश आहे. जगात वाहतूक कोंडीत मेक्सिको पहिल्या क्रमांकावर आहे. गेल्या वर्षी वाहतूक कोंडीत बेंगळुरू तिसऱ्या स्थानावर होते. ते आता दुसऱ्या स्थानावर असून , पुणे चौथ्या स्थानावरून किंचित सुधारणा होऊन पाचव्या स्थानावर गेले आहे.
वाहतूक कोंडीतील पुण्याची स्थिती…
२०२२मध्ये — सातवा क्रमांक
२०२३ मध्ये — सहावा क्रमांक
२०२४मध्ये — चौथा क्रमांक
२०२५मध्ये — पाचवा क्रमांक
१५ मिनिटांत पार होऊ शकणारे अंतर
बेंगळुरू — ४.२ किमी
पुणे — ४.५ किमी
२०२५ मध्ये पुणेकरांचा वाहतूक कोंडीत गेलेला वेळ १५२ तास
