एलआयसीच्या महिला अधिकाऱ्याच्या मृत्यूचं गूढ अखेर उकललं आहे. या महिला अधिकाऱ्याची हत्या तिच्याच सहकाऱ्यानं केली. पोलीस तपासातून याबद्दलचा उलगडा झाला आहे. महिलेचा मृत्यू अपघात असल्याचं भासवण्यात आलं. पण पोलिसांनी या संपूर्ण प्रकरणाचा छडा लावला.
५४ वर्षीय वरिष्ठ अधिकारी कल्याणी नंबी यांना त्यांचाच सहकारी रामनं पेट्रोल टाकून पेटवलं. रामच्या कामात बरेच घोळ होते. ते घोळ कल्याणी यांच्या लक्षात आले. त्यांनी या प्रकरणी खुलासा मागितला. हा प्रकार बाहेर कोणालाही कळू नये यासाठी रामनं कल्याणी यांच्या केबिनला आग लावली. त्यात कल्याणी यांचा मृत्यू झाला. कल्याणी यांचा मृत्यू अपघात असल्याचं भासवण्यात आलं. पण पोलीस तपासातून सत्य समोर आलं. कल्याणी नंबी या मदुराई शाखेच्या व्यवस्थापिका होत्या.
१७ डिसेंबर २०२५ रोजी कल्याणी नंबी मदुराई येथील कार्यालयात दुसऱ्या मजल्यावर असलेल्या केबिनमध्ये बसल्या होत्या. त्याच सुमारास कल्याणी यांच्या केबिनला आग लागली. काही वेळातच ऑफिसमध्ये धूर पसरला. एसीमधून शॉर्ट सर्किट झाल्यानं आग लागल्याचा सगळ्यांचा समज झाला. पण पोलीस तपासातून हत्या प्रकरणाचा उलगडा झाला.
कल्याणी यांची नुकतीच तिनुनेलवेलीतून मदुराईत बदली झाली होती. मृत्यू दाव्यांच्या निपटाऱ्यांमध्ये अनियमितता असल्याचं त्यांच्या लक्षात आलं. आरोपी रामनं ४० पेक्षा अधिक मृत्यू दावे तसेच ठेवले होते. या फाईल्सचा निपटारा रामनं केलेला नव्हता. यावरुन कल्याणी यांनी रामला सुनावलं. त्याच्या विरोधात कारवाई करण्याचा इशारा दिला. यानंतर रामनं कल्याणी यांना ठार करण्याची योजना आखली.
१७ डिसेंबरच्या रात्री कल्याणी नंबी त्यांच्या केबिनमध्ये होत्या. रामनं पेट्रोलच्या बाटल्या तयार ठेवल्या होत्या. त्यानं कार्यालयातील वीज पुरवठा खंडित केला. मुख्य दरवाजा साखळी लावून बंद केला आणि कल्याणी यांना केबिनमध्ये अडकवलं. पोलिसांनी या प्रकरणाचा कसून तपास केला. रामची चौकशी करण्यात आली. त्याच्या दाव्यांमध्ये विसंगती आढळली.
पोलिसी खाक्या दाखवताच रामनं गुन्ह्याची कबुली दिली. कल्याणीमुळे माझी नोकरी धोक्यात होती. त्यामुळे तिला संपवलं, असं त्यानं पोलिसांना सांगितलं. १७ जानेवारीला पोलिसांनी रामला अटक केली. हत्या, पुरावे नष्ट करणं आणि खोटी माहिती देणं, असे गुन्हे त्याच्या विरोधात नोंदवण्यात आले आहेत.
