पुणे: मुंबईसह राज्यातील २९ महापालिकांच्या निवडणुकांसह पुणे महानगरपालिकेच्या १६५ जागांसाठीही निवडणूक आयोगाने १५ डिसेंबर २०२५ रोजी अधिसूचना जाहीर केली होती. २३ डिसेंबर ते ३० डिसेंबर या कालावधीत उमेदवारी अर्ज भरण्याची प्रक्रिया पार पडली. त्यानंतर खऱ्या अर्थाने प्रचाराचा धडाका सुरू झाला. १ जानेवारी ते १३ जानेवारी २०२६ या काळात पुण्याच्या गल्लोगल्लीत राजकीय सभा, पदयात्रा आणि कोपरा सभांचा जोर पाहायला मिळाला. मुख्यमंत्री देवेंद्र फडणवीस, उपमुख्यमंत्री अजित पवार आणि शरद पवार यांच्यासह अनेक दिग्गज नेत्यांनी पुण्यात तळ ठोकला होता. मंगळवारी, १३ जानेवारी रोजी सायंकाळी ५:३० वाजता प्रचाराच्या तोफा थंडावल्या आणि आज, १५ जानेवारी २०२६ रोजी शहरात उत्साहात मतदान पार पडले.
आज मतदान संपल्यानंतर प्रसिद्ध झालेल्या विविध एक्झिट पोल्सच्या आकडेवारीनुसार, पुणे महापालिकेत कोणत्याही एका पक्षाला स्पष्ट बहुमत मिळणे कठीण दिसत आहे. शहरात प्रामुख्याने भाजप, राष्ट्रवादी (अजित पवार गट), राष्ट्रवादी (शरद पवार गट), काँग्रेस आणि शिवसेना (दोन्ही गट) यांच्यात बहुरंगी लढत झाली आहे.
पीआरएबी एक्झिट पोल्सच्या कलानुसार, भाजपला ९३ जागा मिळण्याचा अंदाज आहे. त्यानंतर राष्ट्रवादी काँग्रेस अजित पवार ४३ जागा, शरद पवारांची राष्ट्रवादी आणि काँग्रेसला पुण्यात ८-८ जागा मिळतील. तर शिंदेंची शिवसेना ७ आणि ठाकरेंची शिवसेना पुण्यात ६ जागांवर जिंकेल असा अंदाज पीआरएबीने व्यक्त केला आहे.
दरम्यान, २०१७ च्या निवडणुकीत भाजपने ९८ जागा जिंकून एकहाती सत्ता मिळवली होती, मात्र यंदा राष्ट्रवादी काँग्रेसमधील फूट आणि महाविकास आघाडीच्या एकजुटीमुळे भाजपच्या जागा काहीशा कमी होताना दिसत आहेत.
दरम्यान, उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस महत्त्वाची भूमिका बजावू शकते. जर भाजपला स्वबळावर बहुमत मिळाले नाही, तर अजित पवार गटाचा पाठिंबा पुण्याचा पुढचा महापौर ठरवण्यासाठी निर्णायक ठरेल.
उद्या, १६ जानेवारी रोजी सकाळी ८ वाजल्यापासून मतमोजणी होणार आहे. दुपारी २ वाजेपर्यंत पुण्याचा नवा ‘कारभारी’ कोण असेल हे स्पष्ट होणार आहे.
