पुणे, दि. १ ऑगस्ट : गांजा तस्करांशी संगनमत ठेवून त्यांना संरक्षण देणे, त्यांच्याकडून आर्थिक लाभ स्वीकारणे आणि पोलिस दलाच्या विश्वासार्हतेला तडा जाईल असे वर्तन केल्याचे आरोप सिद्ध झाल्यानंतर स्वारगेट पोलिस ठाण्यातील पोलिस शिपाई नवनाथ कांताराम शिंदे यांना शासकीय सेवेतून बडतर्फ करण्यात आले आहे. विभागीय चौकशी, तांत्रिक पुरावे, साक्षीदारांचे जबाब आणि मोबाईल संपर्काच्या आधारे सर्व आरोप सिद्ध झाल्याचा निष्कर्ष नोंदवत अपर पोलिस आयुक्त (पश्चिम प्रादेशिक विभाग) राजेश बनसोडे यांनी हा कठोर निर्णय घेतला आहे.
प्राथमिक चौकशीनंतर सुरू करण्यात आलेल्या विभागीय चौकशीत नवनाथ शिंदे यांनी स्वारगेट पोलिस ठाण्यात कार्यरत असताना सहकारनगर पोलिस ठाण्याच्या हद्दीतील गांजा तस्करांशी सातत्याने संपर्क ठेवला असल्याचे उघड झाले. चौकशीत संबंधित तस्करांच्या अवैध व्यवसायाला अप्रत्यक्ष संरक्षण देण्यात आले असून, त्याबदल्यात आर्थिक लाभ घेतल्याचेही निष्पन्न झाले. त्यामुळे शिंदे यांच्या वर्तनामुळे पोलिस दलाची प्रतिमा मलिन झाल्याचे चौकशी अधिकाऱ्यांनी नमूद केले.
चौकशीदरम्यान सरकारी साक्षीदारांचे जबाब, मोबाईल कॉल रेकॉर्ड, तांत्रिक पुरावे आणि इतर कागदपत्रांचा सखोल अभ्यास करण्यात आला. तपासात गांजा तस्कराच्या मोबाईलमध्ये नवनाथ शिंदे यांचा मोबाईल क्रमांक जतन असल्याचे तसेच गेल्या दोन वर्षांपासून दोघांमध्ये सातत्याने संपर्क सुरू असल्याचे स्पष्ट झाले. याशिवाय तस्करांकडून नियमित आर्थिक व्यवहार झाल्याचेही पुराव्यांवरून समोर आले.
वरिष्ठ अधिकाऱ्यांनी अवैध धंद्यांविरोधात कठोर कारवाई करण्याचे स्पष्ट निर्देश दिलेले असतानाही शिंदे यांनी त्या आदेशांकडे दुर्लक्ष करून उलट तस्करांना संरक्षण दिल्याचा गंभीर ठपका विभागीय चौकशीत ठेवण्यात आला. त्यामुळे त्यांच्या वर्तनाला पोलिस दलाच्या शिस्तीला बाधा आणणारे आणि सार्वजनिक विश्वासाला तडा देणारे मानण्यात आले.
विभागीय चौकशी अधिकाऱ्यांनी आपल्या अहवालात शिंदे यांचे वर्तन संशयास्पद, बेशिस्त, बेजबाबदार आणि सेवेच्या मूलभूत मूल्यांच्या विरोधात असल्याचे नमूद करत त्यांना सेवेतून बडतर्फ करण्याची शिफारस केली होती. त्यानंतर परिमंडल-२ चे पोलिस उपायुक्त यांनीही आरोप अत्यंत गंभीर असल्याचे नमूद करत बडतर्फीची शिफारस केली.
दरम्यान, नवनाथ शिंदे यांना कारणे दाखवा नोटीस बजावून त्यांचा खुलासा मागविण्यात आला होता. त्यांनी लेखी उत्तर सादर करण्यासोबतच प्रत्यक्ष सुनावणीदरम्यान आपली बाजूही मांडली. मात्र, त्यांचा खुलासा समाधानकारक नसल्याचे नमूद करत अपर पोलिस आयुक्त राजेश बनसोडे यांनी विभागीय चौकशीतील निष्कर्ष आणि वरिष्ठ अधिकाऱ्यांच्या शिफारशींना मान्यता देत त्यांना शासकीय सेवेतून बडतर्फ करण्याचे आदेश दिले.
या कारवाईमुळे पोलिस दलात शिस्तभंग, भ्रष्टाचार किंवा गुन्हेगारी घटकांशी संगनमत करणाऱ्या कर्मचाऱ्यांविरुद्ध कोणतीही तडजोड केली जाणार नसल्याचा स्पष्ट संदेश प्रशासनाने दिला आहे. पोलिस दलाची प्रतिमा आणि जनतेचा विश्वास अबाधित राखण्यासाठी अशा प्रकारच्या प्रकरणांमध्ये कठोर कारवाई सुरूच राहणार असल्याचे वरिष्ठ अधिकाऱ्यांकडून स्पष्ट करण्यात आले आहे.
चौकशीत उघड झालेले महत्त्वाचे मुद्दे :
- गांजा तस्करांशी तब्बल दोन वर्षे सातत्याने संपर्क.
- तस्कराच्या मोबाईलमध्ये पोलिस शिपायाचा क्रमांक जतन.
- अवैध गांजा व्यवसायाला अप्रत्यक्ष संरक्षण दिल्याचा ठपका.
- तस्करांकडून नियमित आर्थिक लाभ घेतल्याचे पुराव्यांतून स्पष्ट.
- विभागीय चौकशीत सर्व आरोप सिद्ध; अखेर सेवेतून बडतर्फीची कारवाई.
