प्रसिद्ध कीतनकार आणि समाजप्रबोधनकार निवृत्ती महाराज देशमुख उर्फ इंदोरीकर महाराजांच्या मुलीचा भव्य विवाहसोहळा आज संगमनेरमध्ये पार पडला. या लग्नासाठी 100 एकरावर मंडप उभारण्यात आला होता.
राज्यातील दिग्गज नेत्यांसह विविध क्षेत्रातील मान्यवर या विवाहसोहळ्याला हजर होते. राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, राजस्थानचे राज्यपाल हरीभाऊ बागडे, पालकमंत्री राधाकृष्ण विखे पाटील, मंत्री छगन भुजबळ यांनी या विवाह सोहळ्याला हजेरी लावली होती. तसेच वारकरी सांप्रदायातील अनेक मंडळी यावेळी हजर होती. यावेळी भगवानगडचे महंत नामदेव शास्त्री यांनी इंदोरीकर महाराजांना एक मोलाचा सल्ला दिला आहे. याबाबत सविस्तर माहिती जाणून घेऊयात.
इंदोरीकर महाराजांच्या मुलीचा साखरपुडा मोठ्या दिमाखात पार पडला होता. त्यामुळे त्यांच्यावर टीका झाली होती. त्यावेळी इंदोरीकर महाराजांनी लग्न आणखी मोठं करणार असं म्हणत ट्रोलर्सना उत्तर दिले होते. त्यानुसार आता लग्नसोहळाही थाटामाटात पार पडला आहे. त्यामुळे आगामी काळात त्यांना ट्रोल केले जाण्याची शक्यता आहे. याबाबत बोलताना भगवानगडचे महंत नामदेव शास्त्री यांनी इंदोरीकर महाराजांना सल्ला दिला आहे. शास्त्री म्हणाले की, ‘हत्ती आला म्हणून कुत्रे भुकायचे थांबत नाही. इंदोरीकरांना एकच सांगेल की टीकेला उत्तर न देता किर्तनातून उत्तर द्या.’
राज्याचे मुख्यमंत्री देवेंद्र फडणवीस यांनी यावेळी बोलताना म्हटले की, ‘इंदोरीकर महाराज यांनी प्रबोधनाच्या माध्यमातून लोक जागरणाचे काम केले. चांगला समाज निर्माण केला आणि समाजाला दिशा देण्याचं काम केलं. या मुलांच्या जीवनात आनंद यावा अशी प्रार्थना करतो. मला अतिशय आनंद आहे, या सोहळ्याला आम्ही उपस्थित आहोत. विखे पाटील, सुजय विखे, दोन्ही युवा आमदार या ठिकाणी उपस्थित आहेत. सर्व इंदोरीकर महाराजांवर प्रेम करणारे, या सर्वांचं मी या लग्नकार्यात स्वागत करतो.’
मंत्री राधाकृष्ण विखे पाटील यांनी यावेळी म्हटले की, ‘सर्वांचे मार्गदर्शक किर्तनकार समाज प्रबोधनकार इंदोरीकर महाराजांच्या कन्येला आशिर्वाद देण्यासाठी उपस्थित राज्याचे मुख्यमंत्री देवेंद्र फडणवीस यांसह सर्व प्रमुख पाहुण्याचे मी आभार मानतो. वेळात वेळ काढून आपण वधू-वरांना आशीर्वाद देण्यासाठी उपस्थित झालात त्याबद्दल मी धन्यवाद मानतो.’ मंत्री छगन भुजबळ यांनी म्हटले की, ‘वधू वरांना आशीर्वाद देतो. महाराष्ट्राच्या बाहेर इंदोरीकरांची कीर्ती आहे. लोकांना खिळवून ठेवणारं व्यक्तिमत्व आहे. युट्यूबवर लाखो -करोडो लोक कीर्तन पाहतात , मी देखील कीर्तन बघतो.’
