जगातील सर्वात मोठी लेखापाल संस्था असलेल्या इन्स्टिट्यूट ऑफ चार्टर्ड अकाउंटंट्स ऑफ इंडिया (ICAI) या प्रतिष्ठित संस्थेच्या 2026-27 या कौन्सिल वर्षासाठी सीए मंगेश पांडुरंग किनारे यांची उपाध्यक्षपदी निवड झाली आहे. त्यांच्या या निवडीमुळे महाराष्ट्रासह देशभरातील लेखापाल क्षेत्रात आनंदाचे वातावरण आहे.
सीए किनारे हे गतिमान व दूरदृष्टी असलेले नेतृत्व, बदलांना सामोरे जाण्याची क्षमता, सकारात्मक दृष्टिकोन आणि संघटनात्मक प्रगती साधण्याची ताकद यासाठी ओळखले जातात. त्यांच्या प्रभावी नेतृत्वामुळे संस्थात्मक पातळीवर अनेक महत्त्वपूर्ण उपक्रम राबवले गेले आहेत.
सध्या ते ICAI चे तिसऱ्या कार्यकाळासाठी केंद्रीय कौन्सिल सदस्य म्हणून कार्यरत आहेत. त्यांनी प्रोफेशनल डेव्हलपमेंट कमिटीचे अध्यक्ष तसेच कमिटी ऑन पब्लिक अँड गव्हर्नमेंट फायनान्शियल मॅनेजमेंट चे अध्यक्ष म्हणून जबाबदारी सांभाळली आहे. तसेच सेंटर ऑफ एक्सलन्स डायरेक्टरेट चे उपाध्यक्ष म्हणूनही त्यांनी कार्य केले आहे. विविध ICAI समित्यांचे सदस्य म्हणून त्यांनी महत्त्वपूर्ण योगदान दिले असून, सहा वर्षे त्यांनी शिस्तपालन समिती (Disciplinary Committee Bench) सदस्य म्हणून काम पाहिले आहे.
ICAI च्या वतीने त्यांची विविध राष्ट्रीय व आंतरराष्ट्रीय संस्थांवर प्रतिनिधी म्हणून नियुक्ती करण्यात आली आहे. लेखा, लेखापरीक्षण, करप्रणाली आणि कॉर्पोरेट गव्हर्नन्स या क्षेत्रात त्यांना ३३ वर्षांहून अधिक अनुभव आहे. ते मुंबई विद्यापीठाचे पदवीधर असून ICAI चे फेलो सदस्य आहेत.
सीए किनारे हे अनेक मर्यादित कंपन्यांमध्ये स्वतंत्र संचालक (Independent Director) म्हणून कार्यरत आहेत. जीएसटी, लेखापरीक्षण आणि कॉर्पोरेट सल्लागार या क्षेत्रात त्यांचे विशेष प्रभुत्व आहे. जीएसटी आणि आचारसंहिता (Code of Ethics) विषयांवरील ते नामांकित प्राध्यापक व व्याख्याते असून विविध प्रतिष्ठित मंचांवर त्यांनी मार्गदर्शन केले आहे.
यापूर्वी 2013-14 या कालावधीत त्यांनी ICAI च्या वेस्टर्न इंडिया रीजनल कौन्सिल (WIRC) चे अध्यक्षपद भूषविले आहे. शिक्षण व सामाजिक क्षेत्रातही त्यांचा सक्रिय सहभाग असून ते विविध ट्रस्टचे विश्वस्त आहेत. अनेक शैक्षणिक संस्था, विद्यापीठे आणि नामांकित व्यासपीठांवर ते अध्यापन कार्य करतात. तसेच महाराष्ट्र शासनाने स्थापन केलेल्या दोन समित्यांवर सदस्य म्हणून त्यांनी सार्वजनिक धोरण निर्मितीतही योगदान दिले आहे.
व्यवसायिक प्रामाणिकपणा, उत्कृष्टता आणि समाजाप्रती असलेली बांधिलकी यामुळे सीए मंगेश पांडुरंग किनारे यांचे व्यक्तिमत्त्व प्रेरणादायी ठरले आहे. त्यांच्या नेतृत्वामुळे ICAI अधिक बळकट होऊन देशातील चार्टर्ड अकाउंटंट्सच्या पुढील पिढीला दिशा मिळेल, असा विश्वास व्यक्त केला जात आहे.
