सोशल मीडियावर सर्पमित्र, पर्यावरणप्रेमी व समाजसेवक म्हणून वावरत लाखो लोकांचा विश्वास जिंकणारा युट्यूबर आकाश जाधव एका धक्कादायक प्रकरणात पोलिसांच्या जाळ्यात अडकला आहे.
सापांचे रेस्क्यू दाखवून लोकप्रियता मिळवणाऱ्या या तथाकथित सर्पमित्राच्या मागे कोट्यवधींचे काळे साम्राज्य दडलं असल्याचा धक्कादायक पर्दाफाश छत्तीसगडच्या महासमुंद पोलिसांनी केला आहे.
रुग्णवाहिकेतून ड्रग्सची डिलिव्हरी
7 जानेवारी रोजी कोमाखान पोलिसांनी संशयावरून थांबवलेल्या एका रुग्णवाहिकेने साऱ्या पोलीस यंत्रणेलाच हादरवलं. पोलिसांच्या तपासात तब्बल ५ क्विंटल २० किलो गांजा आढळून आला असून या गांजाची आंतरराष्ट्रीय बाजारातील किंमत २ कोटी ६० लाख रुपये इतकी आहे.
रॅकेटचा मास्टरमाइंड
रुग्णवाहिकेचा गैरवापर करून चेकपोस्टवरून निर्धास्तपणे तस्करी केली जात असल्याचं पोलीस तपासात स्पष्ट झालं आहे. या घटनेची उकल झाल्यानंतर सर्पमित्र की ड्रग्स डॉन? असा प्रश्न निर्माण झाला आहे. चौकशीतून या रॅकेटचा मास्टरमाइंड आकाश जाधव (रा. अहिल्यानगर, महाराष्ट्र) याचं नाव पुढे आलं आहे.
पुण्यातील बाजारपेठेत हा गांजा पुरवठा करण्याचा डाव
पोलिसांच्या माहितीनुसार, गांजा ओडिशातून थेट महाराष्ट्रात आणला जात होता आणि गेल्या वर्षभरात ६ ते ७ वेळा गांजा आणला गेला. मोठ्या प्रमाणात गांजाची तस्करी होत होती. तसंच पुण्यातील बाजारपेठेत हा गांजा पुरवठा करण्याचा डाव हे सगळे सापांच्या रेस्क्यूच्या आडून सुरू होते.
९ आरोपींना अटक
या प्रकरणात ९ आरोपी अटकेत असून, गांजा तस्करीचे मोठे रॅकेट उघड होण्याचे दाट शक्यता आहे. अँटी नारकोटिक्स टास्क फोर्स व कोमाखान पोलिसांच्या संयुक्त कारवाईत आतापर्यंत ९ आरोपींना अटक करण्यात आली असून यामध्ये घाऊक विक्रेते, वाहतूक करणारे, किरकोळ पुरवठादार अशा सर्वांचा समावेश आहे.
सोशल मीडिया इन्फ्लुएन्सर्सवर संशयाची सुई
सर्पमित्र, समाजसेवक, इन्फ्लुएन्सर या चमकदार ओळखींच्या आड गुन्हेगारीचे जाळे उभे राहत असल्याचा गंभीर प्रश्न या घटनेनं उपस्थित झाला आहे.
…तर तरुणाईवर गंभीर परिणाम
पुण्याला येणारी ही वाहतूक वेळेत अडवली नसती, तर तरुणाईवर याचे गंभीर परिणाम झाले असते.
फॉलोअर्सच्या मागे भयंकर सत्य
लाईक्स व फॉलोअर्सच्या मागे असे भयंकर सत्य दडलेले असू शकते हे या प्रकरणाने पुन्हा एकदा अधोरेखित केलं आहे.
सर्पमित्र आकाश जाधव
अहिल्यानगर (महाराष्ट्र) येथील आकाश जाधव हा सोशल मीडियावर प्रसिद्ध सर्पमित्र म्हणून ओळखला जात होता. सापांचे रेस्क्यू करून त्यांना नैसर्गिक अधिवासात सोडण्याचे व्हिडिओ त्याने यूट्यूब व इन्स्टाग्रामवर शेअर केले असून ते हे व्हिडिओ मोठ्या प्रमाणात व्हायरल झाले होते.
