पुणे, प्रतिनिधी : पंप, व्हॉल्व्ह आणि सिस्टीम्स उत्पादन क्षेत्रातील आघाडीची जागतिक कंपनी केएसबी लिमिटेड (KSB Ltd.) ने आर्थिक वर्ष २०२५-२६ च्या दुसऱ्या तिमाहीत उल्लेखनीय व्यावसायिक वाढ नोंदवली आहे. कंपनीने या कालावधीत ६९०.७० कोटी रुपयांची विक्री नोंदवत मजबूत आर्थिक कामगिरी केली असून, ऊर्जा, औद्योगिक आणि पायाभूत सुविधा क्षेत्रातून मिळालेल्या महत्त्वाच्या ऑर्डर्समुळे आगामी काळातील व्यवसायवाढीबाबत कंपनीने सकारात्मक संकेत दिले आहेत.
कंपनीने दिलेल्या माहितीनुसार, दुसऱ्या तिमाहीत अनेक महत्त्वाच्या राष्ट्रीय प्रकल्पांसाठी केएसबीला मोठ्या ऑर्डर्स प्राप्त झाल्या आहेत. यामध्ये गदरवारा ऊर्जा प्रकल्पासाठी पहिली एलयूव्ही (LUV) पंप ऑर्डर, कैगा अणुऊर्जा प्रकल्पासाठी शटडाउन कूलिंग पंप, महावितरणकडून २,००० सौर पंपांसाठी लेटर ऑफ इंटेंट (LOI) तसेच पवनऊर्जा क्षेत्रातील पहिली कूलिंग पंप ऑर्डर यांचा समावेश आहे. या ऑर्डर्समुळे विविध क्षेत्रांमध्ये कंपनीची उपस्थिती अधिक मजबूत झाली आहे.
केएसबीचे विक्री व विपणन विभागाचे उपाध्यक्ष प्रशांत कुमार यांनी सांगितले की, विविध क्षेत्रांतून सातत्याने मिळणाऱ्या ऑर्डर्समुळे ग्राहकांचा कंपनीवरील विश्वास अधिक दृढ झाला आहे. दर्जेदार उत्पादने, तांत्रिक क्षमता आणि वेळेत प्रकल्प पूर्ण करण्याची कंपनीची कार्यपद्धती यामुळेच ही विश्वासार्हता वाढत असल्याचे त्यांनी नमूद केले.
दरम्यान, कंपनीचे मुख्य वित्त अधिकारी (CFO) महेश भावे यांनी सांगितले की, महसुलात सातत्याने सकारात्मक वाढ होत असून, कंपनीने कार्यक्षमतेत वाढ आणि खर्च नियंत्रणावर विशेष भर दिला आहे. या धोरणामुळे कंपनीची आर्थिक स्थिती अधिक भक्कम होत असल्याचे त्यांनी स्पष्ट केले.
कंपनीच्या मते, देशात औद्योगिक विकास, ऊर्जा निर्मिती आणि पायाभूत सुविधा क्षेत्रात मोठ्या प्रमाणावर गुंतवणूक होत असल्याने भविष्यातही नवीन प्रकल्पांसाठी मोठ्या ऑर्डर्स मिळण्याची शक्यता आहे. त्यामुळे आगामी तिमाहीतही व्यवसायवाढ कायम राहील, असा विश्वास कंपनीने व्यक्त केला आहे.
विशेषतः ऊर्जा, अणुऊर्जा, सौर ऊर्जा आणि पवनऊर्जा या क्षेत्रांमध्ये मिळालेल्या नव्या ऑर्डर्समुळे केएसबीची बाजारातील स्पर्धात्मक स्थिती अधिक मजबूत झाली असून, कंपनीच्या दीर्घकालीन विकासासाठी हा टप्पा महत्त्वाचा मानला जात आहे.
