पुणे, प्रतिनिधी : पुणे शहरात गेल्या काही दिवसांपासून सुरू असलेल्या मुसळधार पावसामुळे नदीपात्रातील पाण्याची पातळी झपाट्याने वाढत असून, संभाव्य पूरस्थितीचा धोका लक्षात घेता पुणे महानगरपालिकेने नदीकाठच्या परिसरातील नागरिकांसाठी तातडीचा सतर्कतेचा इशारा जारी केला आहे. विशेषतः एकता नगर, विठ्ठल नगर आणि निंबझ नगर परिसरातील नागरिकांनी अत्यंत सावध राहून प्रशासनाच्या सूचनांचे काटेकोर पालन करावे, असे आवाहन करण्यात आले आहे.
पाटबंधारे विभागाकडून प्राप्त झालेल्या माहितीनुसार, धरणातून सध्या सुमारे ३५ हजार क्युसेक्स पाण्याचा विसर्ग सुरू करण्यात आला आहे. हवामान खात्याने पुढील काही तासांत आणि दिवसांत जोरदार पावसाची शक्यता वर्तविल्याने धरणातील पाणीसाठा वाढण्याची शक्यता आहे. त्यामुळे परिस्थितीनुसार पाण्याचा विसर्ग ४५ हजार ते ५० हजार क्युसेक्सपर्यंत वाढविण्यात येऊ शकतो, अशी माहिती प्रशासनाने दिली आहे.
या पार्श्वभूमीवर नदीपात्रालगत तसेच सखल भागात राहणाऱ्या नागरिकांनी कोणताही धोका पत्करू नये, असे महापालिकेने स्पष्ट केले आहे. घरातील महत्त्वाची कागदपत्रे, रोख रक्कम, दागदागिने, मौल्यवान वस्तू, इलेक्ट्रॉनिक उपकरणे आणि आवश्यक जीवनावश्यक साहित्य सुरक्षित ठिकाणी हलवावे. तसेच चारचाकी व दुचाकी वाहनेही पूराचा धोका नसलेल्या ठिकाणी पार्क करण्याचे आवाहन करण्यात आले आहे.
प्रशासनाने नागरिकांना नदीकाठ, पूल, पाण्याखाली जाणारे रस्ते आणि पाणी साचलेल्या भागात जाणे टाळण्याचा सल्ला दिला आहे. लहान मुलांना नदीकिनारी जाऊ देऊ नये तसेच अनावश्यक गर्दी करून परिस्थिती पाहण्यासाठी धोकादायक ठिकाणी थांबू नये, असेही प्रशासनाने स्पष्ट केले आहे.
संभाव्य पूरस्थितीमुळे ज्या नागरिकांना तात्पुरते स्थलांतर करावे लागेल आणि ज्यांच्याकडे पर्यायी निवासाची व्यवस्था उपलब्ध नाही, अशा नागरिकांसाठी पुणे महानगरपालिकेने सनसिटी बॅडमिंटन हॉल येथे तात्पुरत्या निवारा केंद्राची व्यवस्था केली आहे. या ठिकाणी नागरिकांसाठी आवश्यक सुविधा उपलब्ध करून देण्याची तयारी प्रशासनाने पूर्ण केली असून, आपत्कालीन परिस्थितीत तत्काळ मदत पोहोचविण्यासाठी विविध विभागांची यंत्रणा सज्ज ठेवण्यात आली आहे.
महापालिका आयुक्त नवल किशोर राम यांच्या निर्देशानुसार आपत्ती व्यवस्थापन विभाग, अग्निशमन दल, आरोग्य विभाग, क्षेत्रीय कार्यालये तसेच इतर संबंधित विभागांना सतर्क राहण्याच्या सूचना देण्यात आल्या आहेत. संभाव्य आपत्तीला तोंड देण्यासाठी आवश्यक मनुष्यबळ, यंत्रसामग्री आणि बचाव पथके सज्ज ठेवण्यात आली असून परिस्थितीवर सातत्याने लक्ष ठेवण्यात येत आहे.
महापालिकेने नागरिकांना कोणत्याही अफवा किंवा अप्रमाणित संदेशांवर विश्वास न ठेवण्याचे आवाहन केले आहे. फक्त प्रशासन, आपत्ती व्यवस्थापन विभाग आणि अधिकृत माध्यमांकडून देण्यात येणाऱ्या सूचनांवरच विश्वास ठेवावा. परिस्थिती गंभीर झाल्यास प्रशासनाकडून स्थलांतराच्या सूचना दिल्या जातील. अशावेळी नागरिकांनी कोणतीही घबराट न करता प्रशासनाला सहकार्य करावे, असे आवाहन करण्यात आले आहे.
पुणे महानगरपालिकेने नागरिकांना सतर्क राहण्यासोबतच परस्परांनाही मदत करण्याचे आवाहन केले असून, विशेषतः ज्येष्ठ नागरिक, लहान मुले आणि दिव्यांग व्यक्तींच्या सुरक्षिततेला प्राधान्य देण्याचे सांगितले आहे. नागरिकांनी वेळेवर खबरदारी घेतल्यास संभाव्य पूरस्थितीत होणारे नुकसान मोठ्या प्रमाणात टाळता येऊ शकते, असा विश्वास प्रशासनाने व्यक्त केला आहे.
