कर्नाटकची राजधानी असलेल्या बंगळुरू मधील गौडाहल्ली परिसरात एक काळजाचा थरकाप उडवणारी घटना समोर आली आहे. येथे सुजाता नावाच्या एका 30 वर्षीय महिलेचा वॉशिंग मशीन वापरत असताना विजेचा जोरदार धक्का लागून दुर्दैवी मृत्यू झाला.
ही घटना सोमवारी सकाळी साडेसात वाजेच्या सुमारास घडली, जेव्हा सुजाता कपडे धुण्यासाठी मशीनजवळ गेली होती. तिला तातडीने जवळच्या व्हीपी मॅग्नस रुग्णालयात दाखल करण्यात आले, मात्र डॉक्टरांनी तिला मृत घोषित केले. सुरुवातीला हा निव्वळ अपघात वाटत असला तरी, आता या प्रकरणाला वेगळे वळण मिळाले असून सुजाताच्या पालकांनी जावयावर गंभीर आरोप केल्याने खळबळ उडाली आहे.
मृत सुजाता ही तुमकुर येथील पांडुरंगैया आणि भाग्यम्मा यांची चौथी मुलगी होती. तिचा विवाह 10 वर्षांपूर्वी बेंगळुरूमधील रिअल इस्टेट व्यावसायिक चेतन याच्याशी झाला होता. सुजाताच्या पालकांच्या दाव्यानुसार, ही घटना तांत्रिक बिघाडामुळे झालेला अपघात नसून एक सुनियोजित कट आहे. सुजाता आणि चेतन यांच्यात गेल्या काही काळापासून मोठे वाद सुरू होते. पती चेतन तिला मानसिक आणि शारीरिकदृष्ट्या त्रास देत असल्याचे आरोप नातेवाईकांनी केले आहेत. याच जाचाला कंटाळून सुजाता महिनाभरापूर्वी आपल्या माहेरी निघून गेली होती, मात्र आठ दिवसांपूर्वीच चेतन आणि त्याच्या आईने समजूत काढून तिला पुन्हा घरी आणले होते.
सुजाता माहेराहून परतल्यानंतर केवळ आठ दिवस झाले असतानाच तिचा अशा संशयास्पद परिस्थितीत मृत्यू झाल्याने संशयाची सुई पतीकडे वळली आहे. माहेरच्या मंडळींनी असा आरोप केला आहे की, चेतनने जाणीवपूर्वक तिला जीवे मारण्याची योजना आखली होती. पतीच्या छळामुळे आधीच तणावात असलेल्या सुजाताचा हा मृत्यू नैसर्गिक किंवा अपघाती नसल्याचा ठाम विश्वास तिच्या आई-वडिलांनी व्यक्त केला आहे. गौडाहल्ली परिसरात या घटनेमुळे मोठी चर्चा सुरू असून, एका विवाहितेचा अशा प्रकारे अंत झाल्याने हळहळ व्यक्त केली जात आहे.
या घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला आणि शवविच्छेदनासाठी व्हिक्टोरिया रुग्णालयात पाठवला आहे. पोलिसांनी सध्या या प्रकरणी गुन्हा दाखल केला असून सर्व बाजूंनी तपास सुरू केला आहे. वॉशिंग मशीनमध्ये करंट येणे हा तांत्रिक अपघात होता की त्यामागे काही जाणीवपूर्वक केलेला कट होता, हे फॉरेन्सिक तपासणीनंतरच स्पष्ट होईल असे पोलीस अधिकाऱ्यांनी सांगितले आहे. शवविच्छेदन अहवाल आणि तांत्रिक तज्ज्ञांच्या अभिप्रायानंतर या प्रकरणातील सत्य समोर येईल, तोपर्यंत पोलीस सुजाताच्या पतीची आणि सासरच्या मंडळींची चौकशी करत आहेत.
