देशातील सगळ्यात मोठी विमान कंपनी असलेल्या इंडिगोच्या विमानाच्या लँडिंग दरम्यान तांत्रिक बिघाड झाला, त्यामुळे विमानातल्या प्रवाशांनी श्वास रोखून धरला होता. मुंबई विमानतळावर शुक्रवारी सकाळी यामुळे काही काळ तणावपूर्ण परिस्थिती निर्माण झाली होती.
वैमानिकाच्या सतर्कतेमुळे सुरक्षित विमानाचे लँडिंग झाले आणि कोणतीही जीवितहानी झाली नाही. सूत्रांनी दिलेल्या माहितीनुसार ही घटना इंडिगोच्या फ्लाइट 6E2157 मध्ये घडली, ज्यामध्ये 210 हून अधिक प्रवासी होते. विमान A321 निओ होते.
लँडिंग गियर लीव्हरमध्ये समस्या
महत्त्वाच्या लँडिंग टप्प्यात, विमानाच्या लँडिंग गियर लीव्हरमध्ये समस्या निर्माण झाली. सूत्रांनी सांगितले की सिस्टमचा ऑटोमॅटिक मोड काम करत नव्हता. या तांत्रिक बिघाडामुळे, वैमानिकांना विमानाची चाके सुरक्षितपणे तैनात करण्यासाठी आणि लँडिंग करण्यासाठी मॅन्युअल मोडचा वापर करावा लागला.
विमानाचे पुन्हा उड्डाण
सुदैवाने, विमान मुंबई विमानतळावर सुरक्षितपणे उतरले. लँडिंगनंतर तांत्रिक पथकाने या समस्येची तपासणी केली आणि बिघाड दुरुस्त केला. सूत्रांच्या माहितीनुसार, दुरुस्तीनंतर विमानाने दिवसभरात इतर नियोजित उड्डाणे केली. या घटनेवर इंडिगोकडून कोणतीही अधिकृत प्रतिक्रिया देण्यात आलेली नाही.
दरम्यान चारच दिवसांपूर्वी 2 फेब्रुवारीला एअर इंडियाच्या हीथ्रो (लंडन) वरून बंगळुरूला जाणाऱ्या एअर इंडिया 787-8 विमानाच्या टेकऑफच्या अगदी आधी फ्युअल कंट्रोल स्विचमध्ये समस्या आल्याचं वृत्त समोर आलं होतं, त्यामुळे या विमानाचं उड्डाण थांबवलं गेलं होतं. हीथ्रोहून बेंगळुरूला जाणाऱ्या एअर इंडियाच्या विमान एआय 132 मध्ये इंजिन सुरू होताना, डाव्या इंजिनवरील फ्युअल कंट्रोल स्विच दोनदा RUN स्थितीत राहिला नाही आणि तो पुन्हा कटऑफ स्थितीत आला. त्यानंतर प्रवाशांच्या सुरक्षेसाठी उड्डाण थांबवलं गेलं.
गेल्या वर्षी अहमदाबादमध्ये क्रॅश झालेल्या एअर इंडियाच्या विमानातही फ्युअल कंट्रोल स्विचमध्ये बिघाड झाला होता.
