पुरंदर तालुक्यातील वीर-सारोळा रस्त्यावरील तोंडल गावानजीक शेडगे वस्तीजवळ (दि. २) रात्री सुमारे ९ वाजण्याच्या सुमारास अज्ञात वाहनाने दिलेल्या जोरदार धडकेत चार ऊसतोड कामगारांचा जागीच मृत्यू झाल्याची घटना घडली.
या प्रकरणी दिनेश प्रकाश निगडे (रा. गुणंद, ता. भोर) यांनी सासवड पोलिस ठाण्यात अज्ञात वाहन व चालकाविरुद्ध फिर्याद दाखल केली आहे.
फिर्यादी दिनेश निगडे यांनी दिलेल्या माहितीनुसार, अपघाताची प्राथमिक माहिती मित्र चेतन वणवे यांच्याकडून फोनद्वारे मिळाल्यानंतर ते तातडीने घटनास्थळी दाखल झाले. तोंडल (ता. पुरंदर) येथील शेडगे वस्तीजवळ वीर-सारोळा रस्त्यावर चार इसम गंभीर जखमी अवस्थेत रस्त्यावर पडलेले दिसून आले. घटनास्थळी पोलिस उपस्थित होते. जखमी हे निगडे यांच्या शेतात ऊसतोडीसाठी काम करणारे कामगार असल्याचे निष्पन्न झाले.
अपघातात मृत्युमुखी पडलेल्यांमध्ये हरिष शिवराम बरडे (वय २६), प्रदीप वसंत भोये (वय २६ दोघे रा. उमरपाडा, ता. आहवा, जि. डांग, गुजरात), अमित सनेश चौधरी (वय २६, रा. चौड, ता. आहवा, जि. डांग) व मुरलीभाई सोन्याभाई महाला (वय २२, रा. गुंडवहळ, ता. आहवा, जि. डांग) यांचा समावेश आहे. सध्या हे सर्व कामगार शेडगेवस्ती, तोंडल येथे वास्तव्यास होते.
प्रत्यक्षदर्शींनी दिलेल्या माहितीनुसार, सारोळ्याहून वीरकडे जाणाऱ्या अज्ञात वाहनाने समोरून येणाऱ्या बजाज प्लॅटिना (क्र. जीजे २१ आर १३२७) दुचाकीला जोरदार धडक दिली आणि वाहन चालक घटनास्थळावरून फरार झाला. जखमींना तातडीने ॲम्ब्युलन्सद्वारे सासवड ग्रामीण रुग्णालयात नेण्यात आले. मात्र डॉक्टरांनी उपचारापूर्वीच चौघांनाही मृत घोषित केले. सर्व मृतदेहांचे पोस्टमार्टेम करून त्यांचे पार्थिव गुजरात येथील मूळ गावी पाठविण्यात आले आहे. या अपघातप्रकरणी सीसीटीव्ही फुटेज तसेच परिसरातील नागरिकांकडून माहिती घेत अपघातास कारणीभूत अज्ञात वाहनाचा शोध सुरू असल्याचे वरिष्ठ पोलिस निरीक्षक कुमार कदम यांनी सांगितले. या प्रकरणाचा अधिक तपास सहायक पोलिस निरीक्षक वैभव सोनवणे करत आहेत.
