श्रीमंत माणसांकडे पैसा खूप असतो पण माणूसकी शून्य असते असे अरोप अनेकदा केले जातात. अन् हे आरोप काही अंशी का होऊना खरे आहेत हे सिद्ध करणारा एक व्हिडीओ समोर आला आहे. एक डिलिव्हरी बॉय चक्क सहा मजले चढून पार्सल पोहोचवण्याचं काम करतोय. लक्षवेधी बाब म्हणजे हे पार्सल खूपच जास्त जड आहे. किंबहूना ती भलीमोठी गोणी घेऊन त्याला एक एक पायरी वर चढणं खूपच कठीण जातेय. पण तरी देखील सोसायटीनं त्याला लिफ्टचा वापर करू दिला नाही. व्हिडीओ पाहा अन् आता तुम्हीच सांगा, माणूसकी खरंच हरवत चालली आहे का?
हा व्हिडीओ @Abhishekkkk10 या एक्स अकाउंटवरून शेअर करण्यात आला आहे. समोर आलेल्या माहितीनुसार हा व्यक्ती पॅकर्स अँड मूव्हर्स कंपनीचा डिलिव्हरी कर्मचारी आहे. व्हिडीओमध्ये तुम्ही स्पष्टपणे पाहू शकता, त्याच्या पाठीवर भलंमोठं पार्सल आहे. पण तरी देखील त्याला लिफ्टचा वापर करू दिला नाही. अर्थात काही सोसायटीमध्ये डिलिव्हरी कर्मचाऱ्यांना लिफ्ट वापरण्यास मनाई असते. पण काही अपवादात्मक परिस्थितीत माणूसकी म्हणून का त्याला लिफ्टचा वापर करू द्यायला पाहिजे होता अशा प्रतिक्रिया बहुतांश नेटकरी देत आहेत.
हा व्हिडीओ आतापर्यंत ९० हजारांहून अधिक वेळा पाहिला गेला आहे. शिवाय शेकडो नेटकऱ्यांनी त्यावर विविध प्रकारच्या प्रतिक्रिया दिल्या आहेत. कोणी म्हणतेय, भारतामध्ये मजुरी स्वस्थ आहे पण माणूसकीची किंमत खूप जास्त आहे. तर कोणी म्हणतेय, साधनं उपलब्ध असतानाही त्याचा वापर करू न देणं हा अपराध आहे. आणखी एका युझरनं एक महत्वाचा सल्ला दिलाय, इमारत उंच असेल तर किमान चार ते पाच मजले सर्व्हिस लिफ्ट असली पाहिजे. जेणेकरून डिलिव्हरी कर्मचाऱ्यांना वरच्या मजल्यावर जाणं थोडंतरी सोयीस्कर होईल. असो, पण हा व्हिडीओ पाहून तुमच्या डोक्यात कुठले विचार आले? तुम्ही देखील आपल्या प्रतिक्रिया द्या.
