मुंबईकरांसाठी एक आनंदाची बातमी समोर आली आहे. 1 फेब्रुवारी, म्हणजेच उद्यापासून रेल्वे प्रवाशांसाठी 4 नव्या लोकल सुरू करण्यात येणार आहेत. या निर्णयामुळे उपनगरिय रेल्वे प्रवाशांना मोठा दिलासा मिळणार आहे. या लोकल 12 डब्यांच्या असून पश्चिम रेल्वेवर या फेऱ्या सुरू करण्यात येणार आहेत. त्यामुळे दहिसर, बोरिवली, वांद्रे या मार्गांवरील प्रवाशांचा रेल्वे प्रवास अधिक सुखकर होणार आहे.
सध्या पश्चिम रेल्वेवर एकूण 1406 लोकल ट्रेन आहेत. आता यांची संख्या वाढून 1410 इतकी होणार आहे. डिसेंबर 2025 पासून पश्चिम रेल्वेवर महिनाभर ब्लॉक सुरू होता. या ब्लॉकमुळे प्रवाशांचे खूप हाल झाले होते. लोकल नेहमी 10-15 मिनिटांच्या विलंबाने धावत असून, दररोज 200हून अधिक लोकल फेऱ्या रद्द केल्या होत्या. कांदिवली ते बोरिवली दरम्यान सहाव्या मार्गिकेचं काम सुरू असल्यामुळे हा ब्लॉक घेण्यात आला होता. परंतु, आता काही दिवसांपूर्वीच या मार्गिकेचं काम पूर्ण झालं आहे. त्यामुळे ब्लॉक रद्द केला असून लोकल फेऱ्या सुरळीत सुरू झाल्या आहेत.
नव्या मार्गिकेमुळे फायदा
ही नवी सहावी मार्गिका सुरू झाल्यामुळे आता पश्चिम रेल्वेला 4 नव्या लोकल गाड्या सुरू करण्यात यश मिळणार आहे. वांद्रे टर्मिनसवर थांबणाऱ्या रेल्वेंना बोरिवली ते वांद्रे दरम्यान पाचव्या आणि सहाव्या मार्गिकांवर वळवण्यात आलं आहे. त्यामुळे उपनगरिय लोकल फेऱ्या सुरळीतपणे सुरू राहतील. तसेच, या मार्गिकांवरील भार कमी झाल्यामुळे नव्या लोकल गाड्या सुरू करण्याचा मार्ग मोकळा झाला आहे.
कसं असेल वेळापत्रक?
आता या चार नव्या लोकलमुळे सर्वसामान्य प्रवाशांना फायदा होणार आहे. या चारपैकी 2 लोकल अप तर 2 लोकल डाऊन दिशेने धावतील. अप दिशेने धावणाऱ्या लोकलमधील पहिली फेरी सकाळी 11.39 वाजता भाईंदर ते वांद्रे दरम्यान असेल. दुसरी लोकल दुपारी 12.14 ला भाइंदर ते चर्चगेटदरम्यान धावेल. तसेच, डाऊन दिशेने धावणाऱ्या लोकलपैकी पहिली लोकल फेरी पहाटो 4.30 वाजता वांद्रे ते भाईंदरदरम्यान धावणार असून दुसरी दुपारी 1.21 वाजता याच मार्गावरून सुटेल.
या वाढीव लोकल फेऱ्यांमुळे प्रवाशांना मोठा फायदा होणार आहे. शिवाया या फेऱ्यांचा परिणाम रेल्वेच्या वेळापत्रकावर होणार असून, काही लोकलच्या वेळांमध्ये काही मिनिटांचा बदल होणार आहे. प्रवाशांनी या बदलांची दखल घेऊनच प्रवास करावा असं अवाहान पश्चिम रेल्वेनं केलं आहे.
