राष्ट्रवादी काँग्रेस पक्षाचे अध्यक्ष आणि राज्याचे उपमुख्यमंत्री अजित पवार यांचा काल (बुधवारी, ता २८) विमान अपघातात मृत्यू झाला. काल (बुधवारी, ता २८) सकाळी ते जिल्हा परिषद निवडणुकीच्या प्रचारसभेसाठी बारामतीत येत होते. मात्र बारामती विमानतळावर विमान लॅंड होण्याच्या वेळी त्यांच्या विमानाला अपघात झाला. या अपघातात अजित पवांरासह विमानातील एकूण ५ जणांचा दुर्दैवी मृत्यू झाला आहे. अजित पवारांच्या मृत्यूची बातमी समोर येताच राज्यावर शोककळा पसरली आहे. या घटनेनं सर्वांनाच मोठा धक्का बसला. या अपघाताबाबत अजित पवारांच्या फार्म हाऊसवरून मन सुन्न करणारा प्रसंग समोर आला आहे. ज्यावेळी अपघात झाला त्याआधी काही वेळापूर्वीपासून अजित पवारांच्या आई आशाताई पवार या फार्म हाऊसवरती सकाळच्या सुमारास टीव्ही पाहत बसल्या होत्या. याच वेळी अचानक अजित पवारांच्या अपघाताची बातमी टीव्हीवर आली. यानंतर पुढे नेमकं काय घडलं, याबाबतचा सविस्तर प्रसंग फार्म हाऊसवरील मॅनेजर संपत धायगुडे यांनी सांगितला आहे. धायगुडे यांनी बोलताना तो मन हेलावणारा प्रसंग सांगितला आहे.
संपत धायगुडे म्हणाले….
“सकाळी सात वाजता नेहमीप्रमाणेच अजितदादांच्या आई फार्म हाऊसवरती टीव्ही पाहत बसल्या होत्या. त्यांना नाश्ता देण्याची तयारी सुरू होती. त्यानंतर सकाळी साडेआठ वाजण्याच्या सुमारास अजितदादांच्या विमान अपघाताची बातमी टीव्हीवर आली होती. आईंनी लगेच आम्हाला विचारलं ‘अरे दादांचा अपघात झाला आहे का?’ पण त्यांनाही वाटलं की अजितदादांना खरचटलं वगैरे असेल, त्यांना काही झालं नसेल.
त्या फार्महाऊसच्या बाहेर चालतच निघाल्या..
पुढे संपत धायगुडे यांनी सांगितलं की, बारामतीमध्ये हॉस्पिटलमध्ये दादांना आणल्याची बातमी टीव्हीवर आली. त्यावेळी आम्ही लगेच आईला पुढच्या बातम्या कळू नयेत, यासाठी बंगल्यावरील टीव्हीची केबल तोडली आणि टीव्ही बंद पडला असल्याचं सांगितलं. त्यांचा मोबाईलही फ्लाईट मोडवरती टाकून दिला. काही झाले नसल्याचे आम्ही त्यांना सांगत होतो. पण दादांना भेटून येऊ चला असे म्हणून त्या फार्महाऊसच्या बाहेर चालतच निघाल्या होत्या. ड्रायव्हरने गाडी बंद पडल्याचेही सांगितले. पण त्या ऐकल्या नाहीत. शेवटी नाईलाजाने त्यांना आम्ही बारामती येथील बंगल्यावर घेऊन गेलो, अशी माहिती संपत धायगुडे यांनी दिली आहे.
