मनोरंजन विश्वात खळबळ उडवणारी घटना समोर आली आहे. धुरंधर चित्रपटात ‘अखलाक कुक’ची भूमिका साकारणारा अभिनेता नदीम खान याला गंभीर लैंगिक शोषण आणि मानसिक छळाच्या आरोपाखाली मुंबई पोलिसांनी अटक केली आहे. मालवणी पोलिस ठाण्यात या प्रकरणी गुन्हा दाखल करण्यात आला असून सध्या आरोपीची चौकशी सुरू आहे.
तक्रारदार महिलेने दिलेल्या माहितीनुसार, ती गेल्या अनेक वर्षांपासून नदीम खानच्या घरी घरकाम करत होती. याच काळात आरोपीने लग्नाचे आमिष दाखवून वारंवार लैंगिक शोषण केल्याचा आरोप तिने केला आहे. हा प्रकार 2015 पासून सुरू असून जवळपास दहा वर्षे सुरू असल्याचा दावा तक्रारीत करण्यात आला आहे.
तक्रारदार महिलेने सांगितले की, सामाजिक भीती, आर्थिक अडचणी आणि भावनिक दबावामुळे तिने बराच काळ गप्प राहणं पसंत केलं. मात्र अलीकडे आरोपीने लग्नास स्पष्ट नकार दिल्यानंतर मानसिक छळ वाढल्याने अखेर तिने पोलिसांकडे धाव घेतली.
तक्रार प्राप्त होताच मालवणी पोलिसांनी तात्काळ गुन्हा नोंदवून नदीम खान याला ताब्यात घेतले. सध्या त्याची कसून चौकशी सुरू असून, घटनाक्रमाची सत्यता तपासण्यासाठी कॉल रेकॉर्ड्स, संदेश, साक्षीदारांचे जबाब आणि इतर पुरावे गोळा केले जात आहेत.
पोलीस सूत्रांनी दिलेल्या माहितीनुसार, या प्रकरणात आणखी पीडित महिला आहेत का, याचाही तपास केला जात आहे. तपासादरम्यान पुरावे समोर आल्यास आणखी कलमे वाढवली जाऊ शकतात.
नदीम खान हा रंगभूमी आणि चित्रपटसृष्टीत चरित्र अभिनेता म्हणून ओळखला जातो. धुरंधर चित्रपटामुळे त्याला अलीकडेच विशेष ओळख मिळाली होती. मात्र त्याच काळात हे गंभीर आरोप समोर आल्याने चित्रपटसृष्टीत मोठी चर्चा सुरू आहे.
सध्या आरोपीकडून किंवा त्याच्या वकिलांकडून कोणतीही अधिकृत प्रतिक्रिया देण्यात आलेली नाही. तपास सुरू असून पुढील कायदेशीर कारवाई तपासाच्या निष्कर्षांवर अवलंबून राहणार आहे.
