शहरातील सांस्कृतिक जीवनाचा महत्त्वाचा केंद्रबिंदू असलेल्या घाणेकर नाट्यगृहाची तिसरी घंटा पुढील तीन महिन्यांसाठी बंद ठेवण्यात येणार आहे. नाट्यगृहाच्या अंतर्गत व संरचनात्मक डागडुजीसाठी हे पाऊल उचलण्यात आले असून, लवकरच प्रत्यक्ष कामाला सुरुवात होणार आहे.
महापालिकेच्या सार्वजनिक बांधकाम विभागाकडून करण्यात आलेल्या पाहणीत नाट्यगृहाच्या काही भागांमध्ये गळती, रंगकामाची झीज, विद्युत यंत्रणांतील तांत्रिक त्रुटी तसेच प्रेक्षक आसनव्यवस्थेच्या दुरुस्तीची गरज असल्याचे निदर्शनास आले होते. याच पार्श्वभूमीवर सुरक्षा आणि सुविधा सुधारणा या उद्देशाने नाट्यगृह तात्पुरते बंद ठेवण्याचा निर्णय घेण्यात आला आहे.
काय काम होणार?
छत, भिंतींतील गळती, रंगकामाची झीज दुरुस्त केली जाणार
विद्युत व प्रकाश व्यवस्था तपासणी व सुधारणा होणार
प्रेक्षक आसनव्यवस्थेचे नूतनीकरण प्रस्तावित
रंगमंच व पडद्यांची आवश्यक दुरुस्ती केली जाणार
स्वच्छतागृह व इतर सोयीसुविधांचे अद्ययावतीकरण
या कालावधीत नाट्यप्रयोग व सांस्कृतिक कार्यक्रम रद्द किंवा स्थलांतरित
कलाकार, नाट्यसंस्था व नाट्यरसिकांची तात्पुरती गैरसोय
सुरक्षा व सुविधा सुधारण्यासाठी प्रशासनाचा निर्णय
काम पूर्ण झाल्यानंतर तीन महिन्यांनी नाट्यगृह पुन्हा खुले करण्याचा मानस
या कालावधीत नियोजित असलेले नाट्यप्रयोग, सांस्कृतिक कार्यक्रम आणि विशेष कार्यक्रम रद्द किंवा इतर नाट्यगृहांमध्ये स्थलांतरित करण्यात येणार आहेत. त्यामुळे कलाकार, नाट्यसंस्था तसेच नाट्यरसिकांची काही प्रमाणात गैरसोय होणार असली, तरी भविष्यात अधिक सुरक्षित व अद्ययावत सुविधा मिळाव्यात यासाठी ही डागडुजी आवश्यक असल्याचे प्रशासनाचे म्हणणे आहे.
नाट्यगृहाचे काम वेळेत पूर्ण करून तीन महिन्यांनंतर पुन्हा प्रेक्षकांसाठी खुले करण्याचा प्रशासनाचा मानस आहे. तोपर्यंत पर्यायी नाट्यगृहांचा वापर करण्याचे आवाहन करण्यात आले आहे.
