पाचगणी प्रतिनिधी : प्रशांत थोरवे
सकाळ दैनिक समूहाच्या वतीने आयोजित करण्यात आलेली भव्य सकाळ NIE चित्रकला स्पर्धा विद्यानिकेतन हायस्कूल, पाचगणी येथे मोठ्या उत्साहात आणि शिस्तबद्ध वातावरणात संपन्न झाली. महाबळेश्वर तालुक्यातील तसेच पाचगणी परिसरातील विविध शाळांमधील इयत्ता पहिली ते दहावीच्या विद्यार्थ्यांनी या स्पर्धेत उत्स्फूर्त सहभाग नोंदवून आपल्या कलागुणांचे प्रभावी प्रदर्शन केले.
विद्यानिकेतन हायस्कूल ही शाळा केवळ शैक्षणिक गुणवत्तेसाठीच नव्हे, तर विद्यार्थ्यांच्या सर्वांगीण विकासासाठी राबविण्यात येणाऱ्या विविध उपक्रमांसाठी तालुक्यात ओळखली जाते. कला, क्रीडा, वक्तृत्व, विज्ञान प्रदर्शन, सांस्कृतिक कार्यक्रम यांसारख्या उपक्रमांत शाळा नेहमीच अग्रेसर असते. विद्यार्थ्यांच्या सुप्त कलागुणांना वाव देणारी, शिस्तप्रिय व उपक्रमशील अशी ओळख असलेल्या या शाळेच्या प्रशस्त व स्वच्छ प्रांगणात ही स्पर्धा यशस्वीरीत्या पार पडली. संस्थेचे सेक्रेटरी श्री. महेश आनंदराव बिरामणे व संस्थेच्या विश्वस्त सौ. स्वाती महेश बिरामणे यांच्या प्रेरणादायी संकल्पना व मार्गदर्शनामुळे संस्थेने शैक्षणिक, सांस्कृतिक व सामाजिक क्षेत्रात अनेक नाविन्यपूर्ण उपक्रम यशस्वीपणे राबविले आहेत.
शाळेच्या प्रांगणात पार पडलेल्या या स्पर्धेचे उद्घाटन संस्थेचे संचालक अथर्व बिरामणे यांच्या हस्ते फीत कापून करण्यात आले. यावेळी सकाळ समूहाचे विजय सुतार, मुख्याध्यापिका ज्योती परदेशी, पत्रकार रविकांत बेलोशे, चित्रकला शिक्षक प्रशांत शेळके यांच्यासह शाळेचे शिक्षकवर्ग व हॉस्टेल स्टाफ उपस्थित होते.
स्पर्धेत इयत्ता पहिली ते दहावीच्या विद्यार्थ्यांनी अतिशय सुंदर, रेखीव आणि कल्पक चित्रे साकारली. रंगसंगती, विषयांची मांडणी व बारकावे यांमुळे अनेक चित्रांनी उपस्थितांचे लक्ष वेधून घेतले. काही विद्यार्थ्यांनी पर्यावरण संवर्धन, स्वच्छता, देशभक्ती व सामाजिक विषयांवर, तर काहींनी निसर्गसौंदर्य व बालविश्व प्रभावीपणे कागदावर उतरवले.
यावेळी विद्यार्थ्यांना मार्गदर्शन करताना अथर्व बिरामणे यांनी कला ही केवळ स्पर्धेपुरती मर्यादित नसून व्यक्तिमत्त्व घडवणारी शक्ती असल्याचे सांगितले. “चित्रकलेमुळे विद्यार्थ्यांच्या मनातील भावना, विचार आणि कल्पनाशक्ती रंगांच्या माध्यमातून व्यक्त होते. मोबाईल व डिजिटल युगात विद्यार्थ्यांनी सर्जनशीलतेला विसरू नये. सातत्य, मेहनत आणि आत्मविश्वास ठेवल्यास कला जीवनात मोठी उंची गाठू शकते,” असे त्यांनी नमूद केले. तसेच विद्यार्थ्यांनी अभ्यासाबरोबरच कला, क्रीडा आणि विविध स्पर्धांमध्ये सहभागी व्हावे, असा सल्लाही त्यांनी दिला.
मुख्याध्यापिका ज्योती परदेशी यांनी सकाळ दैनिकाच्या या उपक्रमाचे कौतुक करत विद्यार्थ्यांच्या सर्वांगीण विकासासाठी अशा स्पर्धा अत्यंत उपयुक्त असल्याचे सांगितले. यावेळी सकाळ समूहाचे विजय सुतार यांनीही विद्यार्थ्यांना शुभेच्छा देताना, विद्यानिकेतन हायस्कूल ही शाळा दरवर्षी सकाळ दैनिकाच्या विविध स्पर्धांच्या आयोजनासाठी मोलाचे सहकार्य करते, त्याबद्दल संस्थेचे विशेष आभार मानले.
सकाळ दैनिक समूहाकडून दरवर्षी राज्यभर शालेय विद्यार्थ्यांसाठी या चित्रकला स्पर्धेचे आयोजन केले जाते. विद्यार्थ्यांमधील सुप्त कलागुणांना चालना देणे, सर्जनशीलता वाढवणे आणि कल्पनाशक्तीला व्यासपीठ उपलब्ध करून देणे हा या उपक्रमाचा मुख्य उद्देश आहे. विविध वयोगटांनुसार विषय देऊन विद्यार्थ्यांना मुक्तपणे विचार मांडण्याची संधी दिली जाते. हजारो विद्यार्थ्यांसाठी ही स्पर्धा प्रेरणास्थान ठरत असून पाचगणीतील या स्पर्धेला लाभलेला उत्स्फूर्त प्रतिसाद विशेष उल्लेखनीय ठरला.
