मुंबईसह राज्यातील 29 महापालिकांचे मतदान पार पडले आणि यादरम्यान अनेक सेलिब्रिटी त्यांच्या कुटुंबियांसह मतदानाचा हक्क बजावण्यासाठी बाहेर पडले होते. मराठी मनोरंजन विश्वातील कलाकारांसह अनेक बॉलिवूडकरदेखील मुंबईकर आहेत. त्यामुळे मुंबईतील विविध मतदान केंद्रांवर जाऊन मुंबई महापालिका निवडणूकीसाठी त्यांनी मतदानाचा हक्क बजावला. यादरम्यान मतदान केल्यानंतर अभिनेता आमिर खान याचा माध्यमांशी संवाद साधतानाचा व्हिडिओ समोर आला आहे.
यंदा मुंबई महापालिका निवडणूक प्रचारादरम्यान मराठीचा मुद्दा चांगलाच चर्चेत आला. त्यामुळे मतदानानंतर आमिरने दिलेली प्रतिक्रिया अधिक चर्चेत आली आहे. मतदान केल्यानंतर आमिरने मुंबईकरांना मतदान करण्याचे आवाहन केले. त्याने बीएमसीचे कौतुकही केले, शिवाय मतदान केंद्रावर करण्यात आलेल्या व्यवस्थेचे कौतुकही केले. मराठीत बोलताना आमिर म्हणाला, ‘नक्की या आणि वोट द्या.’ त्यावेळी माध्यम प्रतिनिधींनी त्याला हीच प्रतिक्रिया हिंदीत देण्याचीही विनंती केली. त्यावर आमिर खानने दिलेली प्रतिक्रिया सध्या सोशल मीडियावर व्हायरल झाली आहे.
हिंदीत प्रतिक्रिया देण्यास सांगितल्यावर आमिरने आश्चर्य व्यक्त केले. तो म्हणाला, ‘हिंदीत का बोलू? हा महाराष्ट्र आहे’. त्यावेळी माध्यम प्रतिनिधींनी सांगितले की, त्याची ही प्रतिक्रिया दिल्लीमध्येही दाखवली जाईल आणि म्हणून हिंदी भाषेतही त्याने मत व्यक्त करावे. त्यावर मग आमिरने हिंदीत उत्तर दिले. तो म्हणाला, ‘अच्छा, दिल्लीतही दाखवले जाईल का… याठिकाणी महापालिकेने खूपच चांगली व्यवस्था केली आहे. मी सर्वांना विनंती करेन की, तुमचे मौल्यवान मतदान करा. याठिकाणी BMC ने खूप चांगली व्यवस्था केली आहे.’
महाराष्ट्रामध्ये भाषेचा मुद्दा एक संवेदनशील विषय झाला आहे. मुंबई महापालिका निवडणुकीच्या पार्श्वभूमीवर याच मुद्द्यावरुन प्रचारही करण्यात आला आणि हिंदी विरुद्ध मराठी हा वाद पुन्हा पेटला आहे. भाजप नेते कृपाशंकर सिंह यांनी मुंबईचा महापौर हिंदी भाषिकच होईल, असा दावा केल्याने हा वाद अधिकच पेटला होता. शिवाय उद्धव ठाकरे आणि राज ठाकरे हे ठाकरे बंधू एकत्र येण्यामागे मराठीचा मुद्दा हे एक महत्वाचे कारण होते. ठाकरे बंधूंच्या सभांमध्येही हा मुद्दा अधोरेखित करण्यात आला होता.
