निसर्गरम्य वातावरणामुळे पर्यटकांचं आकर्षण ठरणाऱ्या ताम्हिणी घाटातून आता एक धक्कादायक घटना समोर आली आहे. माणगाव-पुणे मार्गावरील ताम्हिणी घाटात एका २५ ते ३० वर्षीय तरुणाचा मृतदेह आढळला आहे. तरुणाची धारदार शस्त्राने निर्घृण खून केल्याची धक्कादायक घटना उघडकीस आली आहे. पुरावा नष्ट करण्याच्या उद्देशाने हा मृतदेह घाटातील एका आडमार्गावर फेकून देण्यात आला होता.
कशी उघड झाली घटना?
ताम्हिणी घाटातील स्थानिक ग्रामस्थ आपल्या नातेवाईकांना जमीन दाखवण्यासाठी जंगलाच्या भागातील एका आडमार्गावर गेले होते. यावेळी त्यांना तिथे एका तरुणाचा रक्तबंबाळ अवस्थेतील मृतदेह दिसून आला. घटनेची माहिती मिळताच माणगाव पोलिसांनी तातडीने घटनास्थळी धाव घेतली.
मृतदेहाची पाहणी केली असता, त्यावर धारदार शस्त्राने वार केल्याच्या अनेक खुणा आढळल्या आहेत. आरोपींनी तरुणाची हत्या दुसऱ्या ठिकाणी करून, मृतदेहाची विल्हेवाट लावण्यासाठी आणि पुरावा नष्ट करण्यासाठी ताम्हिणी घाटाचा आसरा घेतला असावा, असा पोलिसांचा प्राथमिक अंदाज आहे. मृतकाची अद्याप ओळख पटलेली नाही.
घटनेचे गांभीर्य ओळखून पोलिसांनी फॉरेन्सिक लॅबच्या पथकाला पाचारण केले आहे. घटनास्थळावरून वैज्ञानिक पुरावे गोळा करण्याचे काम सुरू असून, मृताची ओळख पटवण्यासाठी पुणे आणि रायगड जिल्ह्यातील बेपत्ता व्यक्तींच्या तक्रारींची पडताळणी केली जात आहे. या घटनेमुळे ताम्हिणी घाट परिसरात पर्यटकांमध्ये आणि ग्रामस्थांमध्ये भीतीचे वातावरण पसरले आहे. पोलीस सध्या या प्रकरणाचा अधिक तपास करत आहेत.
