दहीहंडी उत्सवाच्या पार्श्वभूमीवर वाहतूक पोलिसांचा निर्णय; नागरिकांनी पर्यायी मार्गांचा वापर करण्याचे आवाहन
पुणे : श्रीकृष्ण जयंती आणि दहीहंडी उत्सवाच्या पार्श्वभूमीवर पुणे शहरातील वाहतूक व्यवस्थेत मोठे बदल करण्यात आले आहेत. ४ आणि ५ सप्टेंबर २०२६ रोजी शहरातील विविध भागांमध्ये गर्दी होण्याची शक्यता असल्याने काही रस्ते वाहतुकीसाठी बंद करण्यात येणार असून, काही मार्गांवरील वाहतूक पर्यायी रस्त्यांकडे वळविण्यात येणार आहे.
४ सप्टेंबर रोजी सायंकाळी ४ वाजल्यापासून फडके हौद परिसरातील वाहतुकीत बदल करण्यात येणार आहेत. जिजामाता चौक, सोन्या मारुती चौक, गणेश रोड तसेच फडके हौद परिसरात गर्दीनुसार वाहतूक बंद अथवा वळविण्यात येईल. या भागातून प्रवास करणाऱ्या वाहनचालकांनी उपलब्ध पर्यायी मार्गांचा वापर करावा.
तसेच ५ सप्टेंबर रोजी सायंकाळी ४ वाजल्यापासून शिवरकर रोडवरील वाहतुकीवर निर्बंध लागू करण्यात येणार आहेत. या मार्गावरील वाहनांना संविधान चौक, साळुंखे विहार रोड आणि फ्लॉवर व्हॅली लेन आदी पर्यायी मार्गांचा वापर करता येणार आहे.
लष्कर, वारजे, समर्थ, बंडगार्डन आणि काळेपडळ वाहतूक विभागांच्या हद्दीतही परिस्थितीनुसार वाहतूक नियमन, मार्गबदल आणि काही ठिकाणी एकेरी वाहतूक करण्यात येणार आहे. गर्दी वाढल्यास आवश्यकतेनुसार अतिरिक्त वाहतूक निर्बंध लागू केले जाऊ शकतात.
पर्यायी मार्ग व वाहतूक बदल
- फडके हौद परिसर : जिजामाता चौक, सोन्या मारुती चौक आणि गणेश रोड परिसरातील वाहतूक पर्यायी मार्गाने वळविण्यात येणार.
- शिवरकर रोड : ५ सप्टेंबर रोजी सायंकाळी ४ वाजल्यानंतर वाहतूक निर्बंध.
- पर्यायी मार्ग : संविधान चौक, साळुंखे विहार रोड, फ्लॉवर व्हॅली लेन आदी मार्गांचा वापर.
- लष्कर, वारजे, समर्थ, बंडगार्डन, काळेपडळ : गर्दीनुसार वाहतूक नियमन आणि मार्गबदल.
- सार्वजनिक वाहतुकीचा वापर : उत्सवाच्या काळात शक्यतो सार्वजनिक वाहतुकीचा वापर करण्याचे आवाहन.
