पुणे : पुणेकरांच्या वाहनांची ओळख असलेली ‘MH-12’ नोंदणी मालिका आता नव्या टप्प्यावर पोहोचली आहे. पुणे आरटीओकडील सध्याची ‘MH-12-ZZ’ मालिका संपण्याच्या मार्गावर असल्याने नवीन वाहनांची नोंदणी खोळंबू नये, यासाठी ‘MH-61’ ही नवीन मालिका उपलब्ध करून देण्यात येणार आहे.
पुणे आरटीओमध्ये जुलै २०२६ पर्यंत ४४ लाख ७१ हजारांहून अधिक वाहनांची नोंदणी झाल्याचे समोर आले आहे. वाहनांची संख्या सातत्याने वाढत असल्याने उपलब्ध नोंदणी क्रमांकांची मालिका संपत चालली आहे. त्यामुळे नवीन वाहनांसाठी पर्यायी क्रमांक पद्धतीची गरज निर्माण झाली आहे.
मात्र, ‘MH-61’ सुरू झाल्यामुळे ‘MH-12’ची ओळख कायमची संपणार नाही. पुण्याचा ‘MH-12’ कोड कायम ठेवण्यासाठी पर्यायी नोंदणी पद्धतीचा विचार सुरू आहे. केंद्रीय राज्यमंत्री तथा पुण्याचे खासदार मुरलीधर मोहोळ यांनी केंद्रीय मंत्री नितीन गडकरी यांच्याकडे ‘MH-12’ कायम ठेवण्याची मागणी केली आहे.
यापूर्वी ‘MH-12-AAA-1234’ अशा तीन अक्षरी क्रमांकाचा पर्याय विचारात घेण्यात आला होता. मात्र, नंबरप्लेट लांब झाल्यामुळे सीसीटीव्ही आणि ANPR प्रणालीला क्रमांक वाचण्यात अडचणी येण्याची शक्यता असल्याने हा पर्याय पुढे गेला नाही.
त्यामुळे ‘MH-12-1A’ हा पर्यायही विचाराधीन आहे. या पद्धतीसाठी तांत्रिक बदल आवश्यक असल्याने त्याला वेळ लागणार आहे. तोपर्यंत नवीन वाहनांची नोंदणी सुरळीत ठेवण्यासाठी ‘MH-61’ हा तातडीचा पर्याय ठरणार आहे.
महत्त्वाचे म्हणजे, आधीपासून ‘MH-12’ क्रमांक असलेल्या वाहनधारकांना नंबरप्लेट बदलण्याची आवश्यकता नाही. ‘MH-61’चा बदल मुख्यतः नवीन वाहनांच्या नोंदणी मालिकेशी संबंधित आहे.
पुण्यातील वाढती वाहनसंख्या लक्षात घेता भविष्यातील वाहन नोंदणीसाठी अधिक सक्षम आणि तांत्रिकदृष्ट्या योग्य क्रमांक व्यवस्था निर्माण करणे आवश्यक आहे. त्यामुळे ‘MH-61’ ही तात्पुरती व्यवस्था असली तरी पुण्याची पारंपरिक ‘MH-12’ ओळख कायम ठेवण्याच्या पर्यायावर पुढील काळात निर्णय होण्याची शक्यता आहे.
