पुणे शहरातील इतर प्रमुख मार्गांकडे दुर्लक्षाचा आरोप; महापौरांच्या प्राधान्यक्रमावर प्रश्नचिन्ह
पुणे : पुणे शहरातील वाढती वाहतूक कोंडी दिवसेंदिवस गंभीर होत असताना, शहरातील सर्व प्रमुख रस्त्यांवर एकसमान आणि व्यापक उपाययोजना करण्याची मागणी जोर धरत आहे. नगर रस्ता, सातारा रस्ता, सोलापूर रस्ता, बाणेर, औंध, कात्रज, कोथरूड, हडपसर, हिंजवडी, विश्रांतवाडी, विमाननगर, खराडी, येरवडा, पाषाण यांसह अनेक भागांत नागरिकांना दररोज मोठ्या वाहतूक कोंडीचा सामना करावा लागत आहे.
मात्र, या व्यापक प्रश्नावर शहरस्तरीय बैठक घेण्याऐवजी सिंहगड रस्त्यावरील वाहतूक कोंडीवर स्वतंत्र बैठक घेऊन प्रशासनाला निर्देश देण्यात आल्याने महापौरांच्या प्राधान्यक्रमावर प्रश्न उपस्थित केले जात आहेत. महापौर या संपूर्ण शहराच्या असून, वाहतूक कोंडीसारख्या प्रश्नाकडे शहरातील सर्व भागांचा विचार करून पाहणे गरजेचे असल्याची प्रतिक्रिया नागरिक आणि विविध घटकांकडून व्यक्त होत आहे.
सिंहगड रस्त्यासाठी १५ दिवसांत सर्वेक्षण
सिंहगड रस्ता क्षेत्रीय कार्यालयात झालेल्या बैठकीत धायरी, नऱ्हे, नांदेड सिटी, वडगाव ते दांडेकर पूल या परिसरातील मुख्य तसेच पर्यायी रस्त्यांचे सर्वेक्षण करण्याचे निर्देश देण्यात आले. हे सर्वेक्षण करून १५ दिवसांत अहवाल सादर करण्यास वाहतूक पोलिसांना सांगण्यात आले आहे.
या भागातील वाहतूक कोंडी कमी करण्यासाठी वाहतूक वॉर्डनची नियुक्ती, पोलिसांची संख्या वाढविणे, अनधिकृत पार्किंगवर कारवाई, अतिक्रमणे हटविणे, रस्त्यांवरील खड्डे बुजविणे तसेच वाहतुकीला अडथळा ठरणारे बसथांबे आवश्यकतेनुसार स्थलांतरित करण्यासारख्या उपाययोजनांवर बैठकीत चर्चा करण्यात आली.
उंबऱ्या गणपती चौक ते दांडेकर पूलपर्यंत कोंडी
बैठकीत नगरसेवकांनी उंबऱ्या गणपती चौक ते दांडेकर पूल या मार्गावर सकाळी आणि सायंकाळच्या वेळेत निर्माण होणाऱ्या वाहतूक कोंडीबाबत नाराजी व्यक्त केली.
वाहतूक पोलिसांची अपुरी उपस्थिती, विरुद्ध दिशेने होणारी वाहतूक, अनधिकृत पार्किंग आणि रस्त्यालगतची अतिक्रमणे यामुळे वाहतुकीचा वेग मंदावत असल्याचे बैठकीत सांगण्यात आले. परिणामी नागरिकांना दररोज मोठ्या त्रासाला सामोरे जावे लागत असल्याचेही नमूद करण्यात आले.
महापौरांनी वाहतूक पोलिसांच्या कार्यपद्धतीवरही प्रश्न उपस्थित करत, वाहतूक कोंडीच्या वेळी वाहतूक सुरळीत करण्याऐवजी दंडात्मक कारवाईवर अधिक भर दिला जात असल्याचे बैठकीत नमूद केल्याची माहिती आहे. तसेच अतिक्रमणांची माहिती वेळेत महापालिका प्रशासनाला देण्याचे निर्देश पोलिसांना देण्यात आले.
मग इतर प्रमुख रस्त्यांचे काय?
सिंहगड रस्त्यावरील कोंडी सोडविण्यासाठी बैठक घेण्यात आली असली तरी पुणे शहरातील वाहतूक कोंडी केवळ एका रस्त्यापुरती मर्यादित नाही, अशी नागरिकांची भूमिका आहे.
नगर रस्ता, सातारा रस्ता, सोलापूर रस्ता, कात्रज, हडपसर, खराडी, विमाननगर, येरवडा, बाणेर, औंध, कोथरूड, पाषाण आणि हिंजवडी परिसरातही वाहनांच्या वाढत्या संख्येमुळे नियमितपणे वाहतूक कोंडी निर्माण होत आहे. कार्यालयीन वेळा, शाळा-कॉलेजची वेळ आणि सायंकाळच्या गर्दीच्या वेळी अनेक मार्गांवर वाहनचालकांना मोठ्या प्रमाणात विलंब सहन करावा लागतो.
त्यामुळे एका भागासाठी स्वतंत्र बैठक घेण्याबरोबरच संपूर्ण पुणे शहरासाठी एकात्मिक वाहतूक आराखडा तयार करण्याची गरज व्यक्त केली जात आहे.
महापालिका आणि वाहतूक पोलिसांमध्ये समन्वयाची गरज
शहरातील वाहतूक प्रश्न सोडविण्यासाठी केवळ पोलिसांची कारवाई पुरेशी नसून महापालिका, वाहतूक पोलीस, पीएमपीएमएल आणि इतर संबंधित यंत्रणांमध्ये प्रभावी समन्वय आवश्यक असल्याचे मत व्यक्त केले जात आहे.
रस्त्यांवरील अतिक्रमणे, अनधिकृत पार्किंग, अपुरे पार्किंग व्यवस्थापन, बसथांब्यांची ठिकाणे, रस्त्यांची अपुरी क्षमता, खड्डे आणि वाहतूक नियमन या सर्व बाबींचा एकत्रित विचार करून उपाययोजना करण्याची गरज आहे.
“शहरातील इतर भागांसाठीही पुढाकार घ्यावा”
विवेक वेलणकर, अध्यक्ष, सजग नागरिक मंच यांनी सिंहगड रस्त्यावरील वाहतूक कोंडीबाबत महापौरांनी बैठक घेतल्याचे स्वागत केले. मात्र, शहरातील इतर अनेक भागांमध्येही नागरिकांना दररोज वाहतूक कोंडीचा सामना करावा लागत असल्याने त्या भागांतील समस्या सोडविण्यासाठीही महापौरांनी पुढाकार घ्यावा, अशी अपेक्षा त्यांनी व्यक्त केली.
ॲड. नीलेश निकम, विरोधी पक्षनेते, महापालिका यांनी महापौर या केवळ एका प्रभागाच्या नसून संपूर्ण शहराच्या महापौर असल्याचे सांगत, वाहतूक कोंडी हा संपूर्ण पुणे शहराचा प्रश्न असल्याचे मत व्यक्त केले. येत्या काळात संपूर्ण शहराच्या वाहतूक व्यवस्थेबाबत बैठक घेऊन हा प्रश्न सोडविण्यासाठी ठोस उपाययोजना कराव्यात, अशी अपेक्षाही त्यांनी व्यक्त केली.
शहरव्यापी वाहतूक आराखड्याची मागणी
दरम्यान, पुण्याची वाढती लोकसंख्या आणि वाहनांची संख्या लक्षात घेता भविष्यातील वाहतुकीचा विचार करून दीर्घकालीन नियोजन करण्याची गरज आहे. केवळ एखाद्या रस्त्यावर वाहतूक कोंडी झाल्यानंतर उपाययोजना करण्यापेक्षा कोंडीची कारणे शोधून त्यावर कायमस्वरूपी उपाययोजना करण्याची आवश्यकता आहे.
महापालिका आणि वाहतूक पोलिसांनी शहरातील सर्व प्रमुख मार्गांचा स्वतंत्र अभ्यास करून संवेदनशील ठिकाणांची यादी तयार करावी, अशी मागणीही नागरिकांकडून होत आहे.
सिंहगड रस्त्यावरील वाहतूक कोंडी सोडविण्यासाठी घेतलेली बैठक ही सकारात्मक बाब असली, तरी त्याच धर्तीवर पुणे शहरातील इतर भागांसाठीही तातडीने बैठका घेऊन व्यापक कृती आराखडा तयार केला जाणार का, याकडे आता पुणेकरांचे लक्ष लागले आहे.
दरम्यान, या संदर्भात महापौर मंजूषा नागपुरे यांच्याशी संपर्क साधण्याचा प्रयत्न करण्यात आला; मात्र त्यांच्याशी संपर्क होऊ शकला नाही.
