पुणे, दि. १ ऑगस्ट : पुणे आणि पिंपरी-चिंचवडमधील लाखो प्रवाशांसाठी दिलासादायक बातमी समोर आली आहे. खासगी कॅब कंपन्यांकडून आकारल्या जाणाऱ्या अतिरिक्त ‘सर्ज चार्जेस’, मनमानी भाडेवाढ आणि पारदर्शकतेच्या अभावाला पर्याय म्हणून केंद्रीय सहकार मंत्रालयाच्या पुढाकारातून ‘भारत टॅक्सी’ या नव्या ॲप-आधारित टॅक्सी सेवेची पुण्यात अधिकृत सुरुवात करण्यात आली आहे. या सेवेअंतर्गत प्रवाशांकडून आरटीओने निश्चित केलेल्या अधिकृत दरानुसारच भाडे आकारले जाणार असून, कोणत्याही परिस्थितीत अतिरिक्त शुल्क आकारले जाणार नसल्याचा दावा करण्यात आला आहे.
या सेवेचे आणखी एक वैशिष्ट्य म्हणजे, बुकिंग केल्यानंतर अवघ्या साडेचार मिनिटांत कॅब उपलब्ध होणार आहे. त्यामुळे प्रवाशांचा वेळ वाचणार असून, सुरक्षित आणि विश्वासार्ह प्रवासाचा पर्याय उपलब्ध होणार आहे.
३५ हजार चालकांचा सहभाग; पुण्यात मोठा विस्तार
‘भारत टॅक्सी’ सेवेला चालकांकडूनही मोठा प्रतिसाद मिळत आहे. आतापर्यंत ३५ हजारांहून अधिक चालकांनी या सेवेसाठी नोंदणी केली असून, येत्या काही महिन्यांत पुणे आणि पिंपरी-चिंचवड शहरात या सेवेचा मोठ्या प्रमाणावर विस्तार करण्याची योजना आखण्यात आली आहे.
गेल्या अनेक वर्षांपासून पुणे शहरात खासगी ॲप-आधारित कॅब कंपन्यांचे वर्चस्व होते. वाढती मागणी, पावसाळा किंवा गर्दीच्या वेळेत ‘सर्ज प्राइसिंग’च्या नावाखाली अनेकदा प्रवाशांकडून अतिरिक्त भाडे आकारले जात असल्याच्या तक्रारी सातत्याने पुढे येत होत्या. याच पार्श्वभूमीवर केंद्रीय सहकार मंत्रालयाच्या अखत्यारीतील सहकार टॅक्सी को-ऑपरेटिव्ह लिमिटेड या संस्थेमार्फत ‘भारत टॅक्सी’ सेवा सुरू करण्यात आली आहे.
प्रवाशांच्या हिताला प्राधान्य
‘भारत टॅक्सी’चे प्रमुख उद्दिष्ट म्हणजे प्रवाशांना परवडणाऱ्या दरात, सुरक्षित आणि पारदर्शक सेवा उपलब्ध करून देणे. या सेवेत आरटीओने निश्चित केलेल्या भाड्यापेक्षा एक रुपयाही जास्त शुल्क आकारले जाणार नाही. मुसळधार पाऊस, वाहतूक कोंडी किंवा सणासुदीचा काळ असला तरी प्रवाशांना निश्चित सरकारी दरातच सेवा दिली जाणार आहे.
यामुळे खासगी कंपन्यांच्या मनमानी दरवाढीपासून प्रवाशांची सुटका होणार असून, सर्वसामान्य नागरिकांना आर्थिक दिलासा मिळणार आहे.
आंतरशहर सेवेलाही सुरुवात
शहरांतर्गत सेवेसोबतच ‘भारत टॅक्सी’ने इंटरसिटी (आंतरशहर) सेवेलाही सुरुवात केली आहे. सध्या पुणे–मुंबई मार्गावर ही सेवा उपलब्ध असून, लवकरच पुणे–नाशिक, पुणे–सोलापूर आणि पुणे–कोल्हापूर या मार्गांवरही सेवा सुरू करण्याची तयारी सुरू आहे. त्यामुळे व्यावसायिक, नोकरदार आणि नियमित प्रवास करणाऱ्या नागरिकांना याचा मोठा फायदा होणार आहे.
महिलांच्या सुरक्षेलाही प्राधान्य
‘भारत टॅक्सी’ सेवेमुळे महिलांच्या सुरक्षित प्रवासालाही प्राधान्य देण्यात आले आहे. विशेषतः रात्रीच्या वेळेस एकट्याने प्रवास करणाऱ्या महिलांसाठी ही सेवा अधिक सुरक्षित आणि विश्वासार्ह ठरेल, असा विश्वास व्यक्त केला जात आहे. पारदर्शक भाडे प्रणाली आणि अधिकृत नोंदणीकृत चालकांमुळे प्रवाशांचा विश्वास अधिक दृढ होणार आहे.
अधिकाऱ्यांची प्रतिक्रिया
‘भारत टॅक्सी’चे पुणे शहरप्रमुख मोहित मित्रा म्हणाले की, “पुणे आणि पिंपरी-चिंचवडमध्ये आम्ही पूर्णपणे सरकारी दरानुसार सेवा देत आहोत. कोणत्याही परिस्थितीत प्रवाशांकडून अतिरिक्त शुल्क आकारले जाणार नाही. अवघ्या साडेचार मिनिटांत सुरक्षित सेवा उपलब्ध करून देण्याचा आमचा प्रयत्न आहे. या पारदर्शक आणि विश्वासार्ह व्यवस्थेमुळेच आतापर्यंत ३५ हजार चालकांनी आमच्यावर विश्वास दाखवत नोंदणी केली असून, प्रवाशांकडूनही उत्स्फूर्त प्रतिसाद मिळत आहे.”
प्रवाशांकडून स्वागत
नवीन सेवेचे प्रवाशांकडून स्वागत करण्यात येत आहे. अनेक नागरिकांनी खासगी कॅब कंपन्यांच्या वाढीव दरांमुळे होणारा आर्थिक भार कमी होणार असल्याचे सांगितले. विशेषतः महिलांनी सुरक्षित प्रवासाच्या दृष्टीने ‘भारत टॅक्सी’ हा महत्त्वाचा पर्याय ठरेल, अशी प्रतिक्रिया व्यक्त केली आहे.
सर्वसामान्यांसाठी दिलासादायक पाऊल
सरकारी दरात, पारदर्शक प्रणाली, जलद सेवा आणि सुरक्षित प्रवास या चार प्रमुख वैशिष्ट्यांमुळे ‘भारत टॅक्सी’ ही सेवा पुणे आणि पिंपरी-चिंचवडमधील प्रवाशांसाठी मोठा दिलासा ठरणार आहे. केंद्रीय सहकार मंत्रालयाच्या या उपक्रमामुळे खासगी कॅब कंपन्यांना स्पर्धा निर्माण होणार असून, भविष्यात प्रवासी सेवेचा दर्जा आणि पारदर्शकताही वाढण्याची अपेक्षा व्यक्त केली जात आहे.
