खेड तालुक्यात जमिनीच्या लेव्हलिंगचे काम थांबवण्यास सांगितल्याने एका वृद्ध शेतकऱ्याला त्याच्याच भावाने आणि पुतण्यांनी मिळून बेदम मारहाण केली. ही घटना रविवारी (३ मे) दुपारी साडेचार वाजताच्या सुमारास घडली.
याबाबत ६५ वर्षीय व्यक्तीने उत्तर म्हाळुंगे पोलीस ठाण्यात फिर्याद दिली आहे. त्यानुसार चार जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादीच्या जागेत आरोपी जेसीबीने जमीन लेव्हल करत असल्याचे पाहून फिर्यादीने त्यांना जाब विचारला. त्याचा राग आल्याने आरोपीने शिवीगाळ करत फिर्यादीला लाथाबुक्क्यांनी मारले. तसेच दगड, काठीने पाठीवर मारून जखमी केले. फिर्यादी तक्रार देण्यासाठी जात असताना जेसीबी चालकाने त्यांना धमकी देत कानशिलात लगावली. उत्तर महाळुंगे पोलीस तपास करत आहेत.
