उत्तर प्रदेशचे मुख्यमंत्री योगी आदित्यनाथ यांनी शुक्रवारी आपल्या मूळ गावी, म्हणजेच उत्तराखंडमधील पंचूर येथे मुक्काम केला. सत्तेच्या शिखरावर असूनही आपल्या मातीशी आणि माणसांशी असलेली त्यांची ओढ पाहून गावकरी भावूक झाले.
आपल्या व्यस्त दिनचर्यामधून वेळ काढून मुख्यमंत्री योगी आदित्यनाथ जेव्हा आपल्या गावी पोहोचले, तेव्हा तिथे राजकारण्याऐवजी एका प्रेमळ मुलाचे आणि भावाचे रूप पाहायला मिळाले. शनिवारी सकाळी त्यांनी गावात फेरफटका मारला, घरातील मोठ्यांचे आशीर्वाद घेतले आणि विचारपूस केली. यावेळी मुख्यमंत्र्यांचा मुलांबद्दलचा जिव्हाळा ओसंडून वाहताना दिसला.
गावातील लहान मुलांशी गप्पा मारत असताना योगीजींनी त्यांना चॉकलेट्स आणि खाऊ वाटला. यादरम्यान एक मजेशीर आणि मनाला भिडणारा प्रसंग घडला. एका चिमुकल्याने मुख्यमंत्र्यांना फूल दिले, तेव्हा योगीजींनी त्याला खाऊ दिला.
त्या मुलाने तो खाऊ लगेच तिथे उभ्या असलेल्या आपल्या आजोबांच्या हातात दिला. हे पाहून योगी आदित्यनाथ हसले आणि प्रेमाने म्हणाले, “अरे, तो खाऊ तुझ्याकडेच ठेव, आम्ही सुद्धा तुझे आजोबाच लागतो!” त्यांच्या या उत्तराने तिथे हस पिकली आणि गावकऱ्यांची मने जिंकली.
मुलांसोबत बराच वेळ खेळल्यानंतर त्यांनी गावकऱ्यांना एक मोलाचा सल्ला दिला. शहरांकडे धावण्यापेक्षा आपल्या गावातच राहून शेतीवाडी आणि संस्कृती जपण्यासाठी त्यांनी तरुणांना प्रेरित केले.
तत्पूर्वी, शुक्रवारी त्यांनी उत्तराखंडचे मुख्यमंत्री पुष्कर सिंह धामी यांच्यासोबत ‘जनता इंटर कॉलेज’च्या नवीन इमारतीचे उद्घाटनही केले होते. सत्तेचा कोणताही डामडौल न ठेवता आपल्या गावी सामान्य माणसाप्रमाणे वावरणाऱ्या योगीजींची ही साधेपणाची चर्चा आता सोशल मीडियावर जोरात सुरू आहे.
